काठमाडौं । तनहुँको व्यास युवा क्लबको आयोजनामा जारी ‘व्यास युवा कप २०७९’ फुटबल प्रतियोगिताको तेस्रो दिन ६ खेल सम्पन्न भएको छ ।
दमौलीको बीपी वन बाटिकाको मैदानमा आज भएको पहिलो खेलमा मुस्लिम युवा क्लबले मिड प्वाइन्ट युथ क्लबलाई सडन डेथमा पराजित गरेको हो । निर्धारित समय १–१ गोलको बराबरीमा सकिएको थियो । त्यसपछि सडनडेथमा मुस्लिम युवा क्लबले १–० गोल अन्तरले पराजित गरेको हो ।
यस्तै आजै भएको अर्को खेलमा कालिभञ्जाङ गणले बुद्धचोक युनाइेडलाई २–० ले स्तव्ध बनायो । तेस्रो खेलमा थार्पु युवा क्लबले टाइगरल्याण्ड युवा क्लबलसँग ०–३ को पराजय भोग्न बाध्य बन्यो ।
चौथो खेलमा भिमाद् युवा क्लबले भने योङ व्वाइजलाई ३–० गोल अन्तरले स्तव्ध बनाएको थियो । यस्तै अर्को खेलमा ब्यास युवा समाज डाइभरसिटी फुटबल क्लबसँग ०–४ गोल अन्तरको फराकिलो हार व्यहोर्न बाध्य बन्यो । आजको अन्तिम खेलमा ब्यास युथ क्लब ‘ए’ले शेखर युवा क्लबलाई २–० गोल अन्तरले पराजित गरेको थियो ।
अखिल नेपाल फुटबल संघ एन्फाको प्राविधिक सहयोगमा जारी प्रतियोगिताको विजेताले १ लाख ११ हजार १ सय ११ रुपैयाँ नगद पुरस्कार प्राप्त गर्ने छ भने द्वितीय हुने टिमले ५५ हजार ५ सय ५५ रुपैयाँमा चित्त बुझाउने छ । प्रतियोगिताका विजेतालाई नगदका साथै मेडल, ट्रफी र प्रमाणपत्र प्रदान गरिने क्लबका अध्यक्ष मिनबहादुर गुरुङ चरिबाबाले जानकारी दिए ।
प्रतियोगितामा उत्कृष्ट खेलाडी, उत्कृष्ट गोल किपर र सर्वाधिक गोल कर्ता घोषित गरी जनही ५ हजार रुपैयाँ पुरस्कार प्रदान गरिने अध्यक्ष गुरुङले बताए । युवाहरुलाई फुटबल खेलतर्फ आकर्षण गर्ने र राष्ट्रिय एवं अन्तर्राष्ट्रिय फुटबल खेलाडी उत्पादन गर्ने उद्देश्यले उक्त प्रतियोगिताको आयोजना गरिएको क्लबका अध्यक्ष गुरुङले बताए ।
यसैगरी प्रतियोगिताको सर्वोत्कृष्ट खेलाडी, गोल रक्षक र रक्षकलाई पाँच हजार पाँच सय रुपियाँ पुरस्कार प्रदान गरिने छ ।
कूल १३ लाख रुपियाँ लगानीमा आयोजना गर्न लागिएको प्रतियोगितालाई व्यास नगरपालिका, स्थानीय सहयोगी संस्था र विदेशमा भएका क्लबका शुभचिन्तकले सहयोग गरेका छन् । नेपालीहरुको महान पर्व विजयादशमी, शुभदिपावली र छठ पर्वको अवसरमा उक्त फुटबल प्रतियोगिताको आयोजना गरिएको हो ।
