काठमाडौं । राष्ट्रिय खेलकुद परिषद् (राखेप)ले कुनैपनि खेलकुद संघको निर्वाचनमा सहभागी हुने प्रशिक्षक तथा कर्मचारीलाई कारबाही गरिने बताएको छ ।
राखेपमा जागिरे कर्मचारी खेलकुद संघको राजनीतिमा प्रत्यक्ष सहभागी भएर ‘चलखेल’ गरेको समाचार खेलपाटीमा प्रकाशित भएपछि परिषद्ले परिपत्र जारी गर्दै ऐन विपरित कुनैप्नि संघको निर्वाचन सम्वन्धी प्रचार प्रसार, उम्मेदवारी दिने र निर्वाचन सम्वन्धि अन्य गतिविधिमा संलग्न नहुन निर्देशन दिएको हो ।
नेपाल भलिबल संघको केन्द्रिय निर्वाचनमा राखेपका कर्मचारी जगदिश भट्ट, डिबी नेपाली लगायतका कर्मचारी प्रत्यक्ष रुपमा सहभागी भएर एउटा समुहको चुनावी मोर्चामा लागेका थिए । उम्मेदवारको चुनावी घोषणा सभाको व्यवस्थापन, उद्घोषणदेखि मतदातासँग भोट माग्न दुवैले दबाब र प्रभाव देखाएका थिए । राखेपका कर्मचारी प्रचलित ऐन, कानुन विपरित खेलकुद संघको राजनीतिमा संलग्न रहेको भन्दै खेलपाटीले समाचार प्रकाशित गरेपछि घटना सार्वजनीक रुपमा बाहिर आएको थियो ।
समाचारलाई लक्षित गर्दै कर्मचारी प्रशिक्षक जगदिश भट्टले आफुलाई कारवाही गर्न खुल्ला चुनौती दिएका थिए । उनले सार्वजनीक रुपमा आफु भलिबल संघको निर्वाचनमा एक समुहको समर्थक र चुनावी ‘क्याम्पेनर’ रहेको उल्लेख गर्दै खेलकुदको नेतृत्वलाई चुनौती प्रस्तुत गरेका थिए । उनले केही समयमपछि सामाजिक सञ्जालमा राखेको सार्वजनीक अभिब्यक्तिलाई मेटाए ।
राष्ट्रिय खेलकुद विकास ऐन र कर्मचारी नियमावली विपरित प्रशिक्षक भट्टले संघको राजनीतिमा प्रत्यक्ष संलग्न भएको उल्लेख गर्दै सार्वजनीक चुनौती दिएपछि राखेपले परिपत्र जारी गर्दै कर्मचारीलाई सचेत गराएको छ । तर ऐन र नियमावली विपरित भट्ट र नेपाली गतिविधिलाई कारबाही गर्ने विषयमा राखेप मौन देखिएको छ । यस्ता घटनामा राखेपको नेतृत्व उदासिन बन्दा नेपाली खेलकुदमा दण्डहिनताका घटना बढ्दो छ । प्रशिक्षक भएर मैदानमा देखिनुपर्ने प्रशिक्षक भट्ट भलिबलको राजनीतिमा सधै चलखेलमा सक्रिय हुने र सधै अवसर र लाभको पद लिने गरेको आरोप लाग्दै आएको छ ।
ऐन अनुसार बहालवाला कर्मचारी तथा प्रशिक्षक खेल संघको कुनैपनि पदमा रहन नहुने, यदी कुनै पदमा रहेको प्रमाणित भएमा त्यस्तो संघले वैद्यता प्राप्त गर्न नसक्ने उल्लेख गर्दै राखेपले त्यस्ता कर्मचारी तथा प्रशिक्षकलाई प्रचलित कानुन अनुसार कारवाही गरिने व्यवस्थालाई परिपत्रमा अवगत गराएको छ ।
साथै कतिपय कर्मचारी र प्रशिक्षकहरु खेल संघको निर्वाचन सम्बन्धी कार्यमा प्रत्यक्ष संलग्न रहेको बुझिएको उल्लेख गर्दै राखेपले परिषद्बाट खटाईएका बाहेकका कर्मचारी र प्रशिक्षक ऐन विपरित संघको कुनैपनि निर्वाचन गतिविधिमा संलग्न हुन रोक लगाएको हो ।
राखेपले सदस्य सचिव स्तरीय निर्णय गर्दै संघको निर्वाचनमा प्रत्यक्ष सहभागी बनेको खण्डमा कारवाही गरिने प्रस्ट पारेको छ । कर्मचारी प्रशासन शाखाका प्रमुख अनन्ता देवी खनालले परिषद्का सम्पुर्ण विभाग, प्रतिष्ठान र शाखाहरुलाई परिपत्र जारी गर्दै कर्मचारी तथा प्रशिक्षकलाई अब कुनैपनि संघको राजनीति गतिविधिमा संलग्न नहुन निर्देशन गरेकी छिन् ।
