महिला साफ भोलिबाट, के भन्छन् कप्तान र प्रशिक्षक ?

काठमाडौं । महिला साफ च्याम्पियनसिप फुटबल प्रतियोगिता भोलि मंगलबारबाट नेपालमा आयोजना हुँदैछ ।

प्रतियोगितामा आयोजक नेपालसहित भारत, श्रीलंका, भुटान, बंगलादेश, पाकिस्तान र माल्दिभ्सको सहभागिता रहेको छ ।

साफले सहभागी ७ टोलीलाई दुई समूहमा विभाजन गरेको छ ।

नेपाल सहज मानिएको 'बी' रहेको छ । नेपालको समूहमा श्रीलंका र भुटान रहेको छ ।

यस्तै समूह 'ए' मा साविक विजेता भारत, माल्दिभ्स, बंगलादेश र पाकिस्तान रहेको छ ।

च्याम्पियनसिपका लागि सबै टोली नेपाल आईसकेका छन् ।

च्याम्पियनसिप सुरु अघि सोमबार आयोजित प्रि-म्याच कन्फरेन्समा सबै टोलीका  प्रशिक्षक र कप्तानले तयारी राम्रो गरेको बताएका छन् ।

प्रतियोगिता अघि के भन्छन् ७ टोलीका कप्तान र प्रशिक्षकहरु ?

नेपाल -

मुख्य प्रशिक्षक कुमार थापा :- सर्वप्रथम नेपाललाई धन्यवाद दोस्रो पटक प्रतियोगिता आयोजना गरेकोमा । सबै बिगतलाई बिर्सेर राम्रो गर्ने लक्ष्य छ । ७ हप्ताको तयारीले टिम राम्रो अवस्थामा छ । सिनियर र जुनियर खेलाडीको मिश्रण छ ।

 हामीसँग पहिलो पटक ३ जना राष्ट्रिय टिममा परेका छन् । तीन जनाले पुनरागमन गरेका छन् । मैले तयारीका लागि ७/८ हप्ता पाए । म खुसी छु । पहिलेको नतिजा हेरेर अनुमान गर्न सकिदैन । च्याम्पियन को बन्छ भनेर हामी पनि अनुमान गर्न सक्दैनौं ।

आफुले पाएको मौकालाई खेर जान दिने छैनौँ । सिनियर खेलाडीले साफपछि सन्यास लिन्छन होला । उनीहरुको लागि जित्नु छ  ।

हामीले कसैलाई अन्डरस्टिमेट गर्दैनौं । सबै राम्रो बनेर आएका छन् । पहिला लिग चरणमा केन्द्रित रहन्छौं त्यसपछि नकआउटमा ध्यान दिने छौँ ।

तयारीको हिसाबमा हामी तयार छौँ । रंगशालामा पहिलो पटक आधिकारिक च्याम्पियनसिप खेल्दा सबै खेलाडीको मानसिकतालाई सामान्य गराउने छौँ । भुटानलाई ससम्मान पूर्वक च्यालेन्ज दिने छौँ ।

कप्तान एन्जिला सुब्बा :- मलाई कप्तान बनाउनु भएकोमा धन्यवाद। त्यो विश्वासलाई गुम्न दिने छैन । 

अन्तिमसम्म मैदानमा लड्ने छौँ । हामी गोर्खाली हौँ । पहिलो पटक उपाधि जित्न सबै प्रयास गर्ने छौँ ।

कप्तान हुने इच्छा सबैमा हुन्छ ।  मलाई पनि आफ्नो कप्तानीमा उपाधि जित्ने मन छ ।  यो पटक मलाई टिमप्रति विश्वास छ ।  अहिले बोल्नु भन्दा मैदानमा देखाउने छौँ ।

भारत -

मुख्य प्रशिक्षक शुरेन क्षेत्री :- तयारी राम्रो छ । साबि टोलीले तयारीको मौका पाएको छ । फिफाको प्रतिबन्दले केहि असर गर्यो तर हामी च्याम्पियनसिपमा अहिले छौँ ।

कप्तान आशालता देवी :- हामीले धेरै राम्रो टिम बनाएका छौँ । यस पटक पनि उपाधि जित्ने सोचमा छौँ ।

बंगलादेश  -

मुख्य प्रशिक्षक रब्बानी :- विराटनगरको साफ खेल्दै सबै खेलाडी यू-१७ का थिए । अहिले २० भईसकेका छन् । शारीरिक रुपमा राम्रो छन् । हामी राम्रो गर्न सक्छौं । प्रतियोगिता भन्दा पहिला हामीले पहिलो खेलमा ध्यान दिएका छौँ।

भुटान -

मुख्य प्रशिक्षक क्युङ सुक :- हामीले पूर्व तयारीमा ध्यान दिएका छौँ । हामी हाम्रो बिगतलाई सुधार गर्ने छौँ ।

कप्तान पेमा :- नेपालमा मैत्रीपूर्ण खेलेर एक्पोजर पाएका छौँ । त्यसले हामीलाई फाईदा हुन्छ ।

माल्दिभ्स -

कप्तान लिजा :- हामी कठिन ग्रुपमा छौँ । तर, राम्रो प्रतिस्पर्धा दिन सक्छौं ।

मुख्य प्रशिक्षक अहमद सरीफ :- कोच हामीलाई खुसी लागेको छ यहाँ आउँदा । यसले माल्दिभ्स को महिला फुटबल विकासमा सहयोग गर्छ । हामी केहि सरप्राइज दिने छौँ ।

पाकिस्तान -

मुख्य प्रशिक्षक आदील रिज्की :- छोटो समयमा टोली तयार गर्नु चुनौती थियो । हामी ८ वर्षपछि फर्केका छौँ, खुसी छौँ । तयारी राम्रो छ ।

कप्तान मारिया खान :- मलाई पहिलो खेलको ब्यग्र प्रतिक्षा छ । यो टोली प्रतिस्पर्धात्मक छ । हामीसँग युएई र बेलायतमा खेलिरहेका खेलाडी छन् । पहिलो खेल भारतसँग छ । एउटा रिभाईली हो यो त्यसैले साबि जना उत्साहित छन् ।

श्रीलंका -

मुख्य प्रशिक्षक  चामिन्दा :- हामीले टोली छनोट गर्दा ट्रायल गरेर गरेका हौँ  । आर्थिक मन्दीको बेला धेरै समस्या थियो । तर, हामीले ४ हप्ताको अभ्यास गरेका छौँ ।