'पहिलो पटक उपाधि जित्न प्रयास गर्ने छौँ'

काठमाडौं । नेपाली राष्ट्रिय महिला टिमकी नवनियुक्त कप्तान एन्जिला तुम्बापो सुब्बाले पहिलो पटक महिला साफ फुटबल च्याम्पियनसिपको उपाधि जित्न प्रयास गर्ने बताएकी छिन् ।

काठमाडौंमा सोमबार आयोजित प्रि-म्याच कन्फरेन्समा बोल्दै कप्तान एन्जिलाले घरेलु मैदानमा उपाधि जित्न प्रयास गर्ने बताएकी हुन् ।

'अन्तिमसम्म मैदानमा लड्ने छौँ । हामी गोर्खाली हौँ । पहिलो पटक उपाधि जित्न सबै प्रयास गर्ने छौँ,' एन्जिलाले भनिन्।

त्रिपुरेश्वरस्थित दशरथ रंगशालामा आयोजना हुने महिला साफ भोलि मंगलबारबाट सुरु हुँदैछ । नेपालले उद्घाटन खेलमा भुटानसँग खेल्दै प्रतियोगिताको सुरुआत गर्नेछ ।

महिला साफको पाँच संस्करणमा नेपाल चार पटक उपविजेता बनेको छ । नेपालकै विराटनगरमा भएको पछिल्लो संस्करणको फाइनलमा नेपाललाई भारतले हराएको थियो ।

नियमित कप्तान रेनुका नगरकोटी प्रतियोगिता तयारीको क्रममा घाइते भएपछि कुमार थापाले एन्जिलालाई कप्तानीको जिम्मेवारी दिएका हुन् । यस्तै अमृता जैशीलाई उपकप्तान चयन गरिएको छ ।

कप्तान एन्जिलाले आफुमा गरिएको विश्वासलाई गुम्न नदिने समेत बताईन ।

'मलाई कप्तान बनाउनु भएकोमा धन्यवाद। त्यो विश्वासलाई गुम्न दिने छैन,' एन्जिलाले भनिन् ।

एन्जिलाले आफ्नो कप्तानीमा टिमलाई उपाधि दिलाउने इच्छा रहेको समेत बताईन् ।

'कप्तान हुने इच्छा सबैमा हुन्छ । मलाई पनि आफ्नो कप्तानीमा उपाधि जित्ने मन छ । यो पटक मलाई टिमप्रति विश्वास छ । अहिले बोल्नु भन्दा मैदानमा देखाउने छौँ,' एन्जिलाले थपिन ।

नेपाली टिमका मुख्य प्रशिक्षक थापाले बिगतलाई बिर्सिएर प्रतियोगितामा राम्रो गर्ने योजना रहेको बताए ।

'सबै बिगतलाई बिर्सिएर राम्रो गर्ने लक्ष्य छ । ७ हप्ताको अभ्यासले टिम राम्रो अवस्थामा रहेको छ । सिनियर र नयाँ खेलाडीको कम्बिनेसन रहेको छ,' थापाले भने ।

मुख्य प्रशिक्षक थापाले अहिले कुनैपनि टोलीलाई कमजोर प्रतिद्वन्दीको रुपमा लिन नहुने बताए ।

'हामीले कसैलाई पनि अन्डरस्टिमेट गर्दैनौं । सबै टोली राम्रो भएर आएका छन् पहिला लिग चरणमा केन्द्रित रहन्छौं,' थापाले भने, 'त्यसपछि बल्ल नकआउटमा ध्यान दिने छौँ । हामी तयार छौँ ।'

प्रतियोगितामा आयोजक नेपालसहित भारत, श्रीलंका, भुटान, बंगलादेश, पाकिस्तान र माल्दिभ्सको सहभागिता रहेको छ ।