काठमाडौं । बागमती प्रदेशका युवा तथा खेलकुद मन्त्री रत्न ढकालले नवौं राष्ट्रिय खेलकुदमा प्रदेशबाट स्वर्णपदक जित्ने सबै खेलाडीलाई मासिक भत्ता उपलब्ध गराउने गरि लागत प्रस्ताव तयार गर्न निर्देशन दिएका छन् ।
शनिबार साँझ भएको छलफलमा मन्त्री ढकालले सबै खेलका स्वर्णधारी खेलाडीलाई मासिक भत्ता उपलब्ध गराउने गरि लागत प्रस्ताव तयार गर्न प्रदेश खेलकुद विकास परिषद्का सदस्य सचिवलाई निर्देशन दिएका हुन् ।
बागमती प्रदेशले नवौं राष्ट्रिय खेलकुदमा प्रदेशको प्राथमिकतामा परेका ९ खेलका स्वर्ण पदक विजेता खेलाडीलाई मासिक ६ हजार रुपैयाँ भत्ता दिने निर्णय गरेको छ ।
खेलकुद नियमावलीमै व्यवस्था गरेर प्रदेश सरकारले तेक्वान्दो, एथलेटिक्स, कराँते, ब्याडमिन्टन, फुटबल, बक्सिङ, क्रिकेट, भलिबल र पौडीमा स्वर्ण पदक विजेता खेलाडीलाई मासिक ६ हजार रुपैयाँ उपलब्ध गराउने निर्णय गरेको हो ।
प्रदेश सरकारले ९ खेललाई प्रदेशको प्राथमिकताको खेलमा वर्गिकरण गरेको छ । सोही अनुसार ९ वटा खेलमा लगानी गरेर नतिजा निकाल्ने प्रदेश खेलकुद विकास परिषद् बागमतीको योजना छ । सोही अनुसार नवौं राष्ट्रिय खेलकुदमा प्रदेशको प्राथमिकतामा परेका ९ खेलका स्वर्ण पदक विजेता खेलाडीलाई मासिक भत्ता उपलब्ध गराउने सरकारको घोषणा गरेको हो ।
प्रदेशको प्राथमिकतामा परेका खेलका स्वर्ण पदक विजेता खेलाडीलाई मात्र मासिक भत्ता उपलब्ध गराउने निर्णय सकारात्मक भएपनि अन्य खेलका खेलाडीले गुनासो गर्दै आएका थिए । स्वर्ण पदकका लागि आफुहरुको समेत समान लगानी र योगदान हुने भन्दै सबै खेलका स्वर्ण पदक विजेता खेलाडीलाई मासिक भत्ताको व्यवस्था गर्नुपर्ने उनीहरुको माग छ ।
खेलाडीको गुनासो र सम्बद्ध खेलको सुझावपछि प्रदेश सरकारले सबै खेलका स्वर्ण पदक विजेता खेलाडीलाई भत्ता उपलब्ध गराउने दिशामा अघि बढेको हो । सोही अनुसार प्रदेशका युवा तथा खेलकुद मन्त्री ढकालले अनुमानित लागत तयार गरेर प्रस्ताव अघि बढाउन सदस्य सचिवलाई सुर्यलाल भण्डारीलाई निर्देशन दिएका छन् ।
‘दोहोरो सुविधा नहुने गरि प्रदेशका स्वर्ण पदक विजेता खेलाडीलाई मासिक भत्ता दिने नविनतम योजना प्रदेशले अघि सारेको हो । सबै खेलका खेलाडीलाई मासिक भत्ता उपलब्ध गराउँदा समेत प्रदेश सरकारलाई धेरै आर्थिक भार नपर्ने देखिन्छ । खेलाडीमा लगानी गर्ने कुरामा प्रदेश सरकार स्पष्ट छ ।’ प्रदेश खेलकुद विकास परिषद् बागमतीका सदस्य सचिव सुर्यलाल भण्डारीले भने, ‘मन्त्रीको निर्देशन अनुसार लागत प्रस्ताव तयार गर्ने काम अघि बढेको छ । अब सबै खेलका स्वर्ण पदक खेलाडीलाई मासिक भत्ता दिने योजना बन्छ ।’
सदस्य सचिव भण्डारीका अनुसार मन्त्रीको निर्देशनसँगै लागत अनुमान गरि प्रस्ताव तयार गर्ने काम अघि बढेको छ । प्रस्तावलाई प्रदेशको मन्त्रीपरिषद्बाट पारित गरेर घोषणा गर्ने प्रदेश सरकारको तयारी छ ।
नवौं राष्ट्रिय खेलकुदमा बागमती प्रदेशले प्रथम स्थान हासिल गर्ने लक्ष्य सहित तयारी अघि बढाएको छ । बागमती प्रदेशले नवौंमा सहभागी सबै ३६ वटै खेलमा प्रतिस्पर्धा गर्ने र सोही अनुसार खेलाडी छनोटको कामलाई तिव्रता दिएको छ । प्रदेशका विभिन्न जिल्लामा अहिले प्रदेश छनोटको काम अघि बढेको छ ।
