फिफा विश्वकप : इरान र स्पेनबीचको खेल सुरु

एजेन्सी । फिफा विश्वकप फुटबल अन्तर्गत समूह चरणको दोस्रो खेल खेल्न स्पेन र इरान मैदान प्रवेश गरेका छन्  । कजानस्थित कजान एरिनामा दुवै टोली ३ अंक जोड्ने लक्ष्यसहित मैदान उत्रिएका छन् ।

समूह 'बी' मा रहेको स्पेनले पहिलो खेलमा पोर्चुगलसँग ३ - ३ गोलको बराबरी खेलेको थियो । स्पेनलाई दोस्रो चरणमा पुग्न जित्नै पर्ने दबाब रहेको छ ।  इरानविरुद्ध स्पेन ३ अंकको लागि मैदान उत्रिएका छन् । 

यता, इरान पहिलो खेलमा मोरक्कोविरुद्ध निकालेको जितले निकै आत्मविश्वासका साथ मैदान उत्रेका छन् ।  इरानले मोरक्कोलाई १ - ० ले हराएको थियो ।  स्पेनविरुद्ध जित वा बराबरी खेल्दै इरान दोस्रो चरणमा पुग्ने सम्भावना कायम राख्न चाहान्छ । 

यो समूहमा पोर्चुगलले ४ अंक जोडेको छ । उसले आज भएको खेलमा मोरक्कोलाई १ - ० ले हराएको थियो ।  लगातार दुई खेल गुमाएको मोरक्को प्रतियोगिताबाट बाहिरिने पक्का जस्तै छ । 

पाँचौ पटक विश्वकप खेलिरहेको इरानकोले अघिल्ला विश्वकपमा युरोपियन राष्ट्रलाई हराउन सकेको छैन । अघिल्ला ६ भेटमा ५ खेल गुमाएको इरानले १ बराबरी खेलेको छ । यता, स्पेन एसियन राष्ट्रविरुद्ध अपराजित रहेकोछ ।