हालान्डलाई रोक्न कठिन

काठमाडौं । पाँच खेल । दुई ह्याट्रिक । प्रिमियर लिगमा रेकर्डहरू पहिले नै ध्वस्त हुने क्रम चलिरहेको छ ।

यो म्यानचेस्टर सिटीमा एर्लिङ हालान्डको प्रभाव हो ।

सिटीले नटिङ्घम फरेस्टलाई ६-० ले हराएको खेलमा हालान्डले पहिलो हाफमा ह्याट्रिक पूरा गरिसकेका थिए । ठ्याक्कै त्यस्तै ह्याट्रिक जब चार दिन अघि क्रिस्टल प्यालेसलाई हराउन २-० पछि पुनरागमन गर्दै पूरा गरेका थिए ।

२२ वर्षीय खेलाडी आफ्नो पहिलो पाँच प्रिमियर लिग खेलमा ९ गोल गर्ने पहिलो खेलाडी बनेका छन् । उनी अगस्ट महिनामा नौ गोल गर्ने पहिलो खेलाडी हुन् । यति मात्र होइन म्यानचेस्टर सिटीका नयाँ अर्जेन्टिनी युवा जुलियन अल्भारेजका लागि पनि हालान्ड कभर गर्दैछन् । दोस्रो हाफमा दुई गोलको साथ अल्भारेजले आफ्नो प्रिमियर लिगमा 'फुल डेब्यु' गरे ।

'उनी प्रतिभाशाली छन् । उनले धेरै कुरा पाएका छन्,' फरेस्टका प्रशिक्षक स्टीव कुपरले खेलपछि भने ।

पूर्व स्ट्राइकर डियोन डब्लिनले हालान्डका बारेमा भने, 'म्यान सिटीसँग अहिले विश्वकै उत्कृष्ट स्ट्राइकर छन् । यदि उनी प्रिमियर लिगमा रहे भने सबै रेकर्ड तोडिनेछ ।'

हालान्डले उपाधि चाहन्छन् साथै कीर्तिमान पनि - पेप ग्वार्डीओला

हालान्ड प्रिमियर लिगका लगातार खेलमा ह्याट्रिक गर्ने सातौं खेलाडी बनेका छन् । टोटनह्यामका ह्यारी केन एकभन्दा बढी पटक यस्तो गर्ने एक मात्र खेलाडी हुन् ।

आश्चर्यजनक रूपमा हालान्डले अब अगस्टमा केन भन्दा धेरै प्रिमियर लिग गोल गरेका छन् । केनले अगस्टमा सात गोल गरेका थिए ।

सिटीका लागि धेरै ह्याट्रिक गर्ने खेलाडीमा हालान्डले रहिम स्टर्लिङ र कार्लोस टेभेजको बराबरी गरे । लेजेण्ड सर्जियो अगुएरोले मात्र बढी ह्याट्रिक गरेका छन् । चार पटक ।

प्रशिक्षक पेप ग्वार्डीओला हालान्डलाई सिटीको इतिहासमा अगुएरो जस्तै केन्द्रीय व्यक्तित्व बन्न असम्भव हुने महसुस गर्छन् ।

यद्यपि, फरवार्ड पोजिसनमा हालान्डसँग विशेष प्रकारको प्रतिभा छ भन्ने कुरा ग्वार्डीओला स्विकार्छन । र, उनी यो पनि सोच्छन् कि व्यक्तिगत उपलब्धिहरूले हालान्डलाई धेरै अर्थ राख्दैन यदि उनी सिटीलाई ट्रफी जित्न मद्दत गर्न असफल भए भने ।

'सर्जियो अगुएरो लेजेण्ड हुन्,' ग्वार्डीओलाले भने, 'आधुनिक इतिहासमा सबैभन्दा महत्त्वपूर्ण गोल गर्दै सिटीका फ्यानहरूको मनमा रहेको उनको स्थान कसैले लिन सक्दैन ।'

'तर हालान्डसँग त्यहाँ पुग्ने गुणस्तर छ । उनले नर्वे, अष्ट्रिया र जर्मनीमा जे गरेका छन् उनले यहाँ गर्न कोसिस गर्छन । उनलाई मैले जति चिनेको छु मलाई लाग्छ यदि हामी ट्रफी जित्न असफल भयौं भने उनि व्यक्तिगत कीर्तिमान बनाउदा खुसी हुने छैनन्,' उनले थपे ।

वेल्सका पूर्व डिफेन्डर एस्ले विलियम्सले भने, 'उनी प्रिमियर लिगको लागि वास्तविक समस्या हुन् । उनीविरुद्ध खेल्न गाह्रो छ । एर्लिङ पूर्ण स्ट्राइकर हुन । उनीसँग सबै कुरा छ ।'

'जब हामीले यो सिजनमा उनले गरेका गोलहरू हेर्छौं, उनी एक प्रोपर स्ट्राइकर हुन । उनले गोल गर्ने क्षमता मात्र पाएको छन् र म उनलाई यो सिजन देख्न पाउँदा उत्साहित छु किनभने उनले अझै धेरै गोल गर्ने छन्,' विलियम्सले थपे ।

ग्यारी लिनेकर भन्छन्, 'उनी जुन हिसाबले अगाडी बढिरहेका छन् पक्कैपनि एलन सिररको प्रिमियर लिगमा सर्बकालिन गोलको रेकर्डलाई ह्यारी केन भन्दा पहिले उनले तोड्ने छन् ।'

खेलपछि हालान्डलाई सोधियो, 'कस्तो महसुस भैरहेको छ ?'

'म पेप ग्वार्डीओला र साथीहरूलाई सकेसम्म सुन्न प्रयास गर्छु । उनीहरु अद्भुत फुटबलरहरू हुन् । साथीहरु बिना म गोल गर्न सक्दिन । यो केमिस्ट्री खोज्ने र पेपलाई सुन्ने हो,' हालान्डले भने,'मलाई म्यानचेस्टर सिटी मन पर्छ । तपाईले हेर्न सक्नुहुन्छ । यो अद्भुत छ । उत्कृष्ट क्लब र उत्कृष्ट छनौट । म मेरो बुबा र मिनो राइओलालाई धन्यवाद दिन चाहन्छु ।'

-बीबीसीबाट