मकवानपुरमा पहिलो पटक रग्बी

हेटौंडा । मकवानपुरमा पहिलो पटक रग्बी खेलको आयोजना भएको छ ।

हेटौंडा–५ स्थित पिप्ले–क्याम्पा रंगशालामा शनिबार मकवानपुरको महिला र पुरुष टिमले चितवन जिल्लाको टिमसँग मैत्रीपूर्ण खेल खेलेको हो ।

पुरुषतर्फको खेलमा चितवन र महिलातर्फको खेलमा मकवानपुर विजयी भएको छ ।

चितवनको पुरुष रग्बी टिमसँग मकवानपुरका पुरुष रग्बी टिम ३–१ स्कोरले पराजित भएको हो ।

महिलातर्फ भने मकवानपुर रग्बी टिमले चितवन महिला रग्बी टिमलाई ७–० स्कोरले हराएको हो । विजयी महिला र पुरुष टिमले ट्रफी प्राप्त गरेको छ ।

मकवानपुर रग्बी संघका अध्यक्ष लिला कुमार घलानको अध्यक्षता तथा जिल्ला समन्वय समिति मकवानपुर प्रमुख ललित घलानको प्रमुख आतिथ्यमा खेलको उद्घाटन कार्यक्रम भएको थियो ।

कार्यक्रममा जिल्ला खेलकुद विकास समिति मकवानपुरका अध्यक्ष वेश खड्गी, हेटौंडा–५ का वडाध्यक्ष सुशील घिमिरे र हेटौंडा–१ का वडाध्यक्ष सविन न्यौपानेको आतिथ्य रहेको थियो ।