काठमाडौं । बागमती प्रदेश सरकारले नवौं राष्ट्रिय खेलकुद प्रतियोगितामा स्वर्ण पदक विजेता खेलाडीलाई मासिक भत्ता उपलब्ध गराउने घोषणा गरेको छ ।
प्रदेश खेलकुद विकास परिषद् बागमतीले शुक्रबार काठमाडौंमा पत्रकार सम्मेलन गर्दै प्रदेशका स्वर्ण पदक विजेता खेलाडीलाई मासिक ६ हजार रुपैयाँ भत्ता उपलब्ध गराउने जानकारी गराएको हो ।
प्रदेश सरकारले आफुले प्राथमिकतामा राखेको ९ खेलका स्वर्ण विजेता खेलाडीलाई मासिक भत्ता उपलब्ध हुने बताएको छ ।
प्रदेश युवा तथा खेलकुद मन्त्री रत्नप्रसाद ढकालले नवौंमा स्वर्ण पदक विजेता खेलाडीलाई दशों राष्ट्रिय खेलकुद प्रतियोगितासम्म मासिक भत्ता उपलब्ध हुने बताए ।
‘नवौंमा स्वर्ण पदक जित्ने खेलाडीलाई उपलब्ध हुने भत्ता अर्को राष्ट्रिय खेलकुद प्रतियोगिता नहुदाँसम्म जारी रहन्छ ।’ उनले भने, ‘प्रदेशले यसलाई सुरुवात गरेको हो । सिंगो खेलकुदमा यो महत्वपुर्ण घोषणा हो भन्ने लागेको छ ।’
बागमती प्रदेशले फुटबल, क्रिकेट, भलिबल, एथलेटिक्स, बक्सिङ, कराते, तेक्वादो, ब्याडमिन्टन र पौडी खेललाई प्रदेशको प्राथमिकताको खेलमा सुचिकरण गरेको छ । प्रदेशले गत वर्षमात्र आफुले प्राथमिकतामा राखेका ८ खेललाई समावेश गर्दै पहिलो प्रदेश स्तरीय प्रतियोगिताको आयोजना गरेको थियो ।
प्रदेश खेलकुद विकास परिषद् बागमतीका सदस्य सचिव सुर्यलाल भण्डारीले राज्यको सिमित स्रोत साधनमा खेलहरुको प्राथमिकता निर्धारण गरेर ९ खेलका स्वर्ण विजेता खेलाडीलाई भत्ता उपलब्ध गराउने कामको सुरुवात गरिएको बताए ।
‘यो सुरुवात मात्र हो । खेल र खेलाडीको दायरा बिस्तारै बढाउँदै लैजाने लक्ष्य छ ।’ सदस्य सचिव भण्डारीले भने, ‘विस्तारै अन्य प्रदेशले पनि यस कार्यक्रमलाई निरन्तरता दिने विश्वास लिएका छों ।’
‘राज्यको स्रोत साधनले सबै खेलमा लगानी गर्न पुग्दैन । खेलको प्राथमिकता निर्धारण गरेर लगानी गरेका छौं । हामीले वर्गिकरणबाट छनोट गरेका खेलको अन्तराष्ट्रिय स्तरमा पदकको सम्भावना पनि छ ।’ उनले भने ।
भण्डारीले प्रदेश सरकारको निर्णयबाट प्रदेश स्तरमा रहेका खेलाडीलाई राहत मिल्ने धारणा राखे । उनले नियमावलीमै यसलाई समावेश गरेर खेलाडीलाई भत्ताको व्यवस्था गरिएको उल्लेख गरे ।
देश संघीयतामा गएसँगै प्रदेश सरकारले आफ्ना खेलाडीलाई मासिक भत्ता दिने गरेको यो पहिलो र ऐतिहासिक निर्णय हो । सरकारले समेत अन्तराष्ट्रिय स्तरमा पदक विजेता खेलाडीलाई मासिक भत्ताको व्यवस्था गरेपनि राष्ट्रिय प्रतियोगिता विजेता खेलाडीलाई समेट्न सकेको थिएन ।
तत्कालिन क्षेत्र र वर्तमान प्रदेश सरकारले खेलाडीलाई नियमित भत्ताको व्यवस्था गर्न नसक्दा धेरै खेलाडी पलायन हुने गरेका थिए भने केही खेलाडीलाई विभागीय टिमले सिमित समयका लागि सम्झौतामा राख्दै भत्ता उपलब्ध गराउने गरेका थिए ।
बागमती प्रदेशको पछिल्लो निर्णयले खेलाडीले प्रदेशबाटै खेलेर मासिक भत्ता प्राप्त गर्ने ढोका खुलेको छ । यसलाई अन्य प्रदेशले समेत घोषणा गर्नुपर्ने नैतिक दबाब थपेको छ ।
यस्तै, नवौं राष्ट्रिय प्रतियोगिताको तयारीको सन्दर्भमा बागमती प्रदेश सरकारले सबै ३६ वटै खेलका सम्पुर्ण स्पर्धामा सहभागी हुने घोषणा गरेको छ । प्रदेश छनोटबाट आएका खेलाडीलाई ४५ दिन बन्द प्रशिक्षणमा राख्ने निर्णय गरेको बागमतीले भदौ २० गतेभित्र प्रदेश छनोट सक्ने बताएको छ ।
यस्तै राखेपको समयसिमा अनुसार भाद्र २५ गतेभित्र खेलाडीको विवरण पठाउने जानकारी गराउँदै प्रदेश सरकारले नवौं राष्ट्रियमा ७ सय ९ खेलाडीलाई सहभागी गराउने बताएको छ ।
नवौंको छनोट र तयारीमा करिब ९ करोड खर्च हुने अनुमान गरेको प्रदेश सरकारले ५ करोड रुपैयाँ प्राप्त गरेको र बाँकी रकम प्रदेश सरकारसँग माग गरिएको जानकारी गराएको छ । राखेपले प्रदेश सरकारलाई तयारीका लागि उपलब्ध गराएको ४९ लाख रुपैयाँ आफुहरुले प्राप्त गरेको बागमती सरकारको धारणा छ ।
गण्डकी प्रदेशमा आयोजना हुने नवौं राष्ट्रिय खेलकुद असोज २८ गतेबाट कात्तिक ३ गतेसम्म हुनेछ ।
-1747226778.jpeg)
