हङकङ एसिया कपमा छनोट

काठमाडौं । हङकङ एसिया कप क्रिकेटका लागि छनोट भएको छ ।

बुधबार राति भएको खेलमा यूएईलाई हराउँदै हङकङ शीर्ष स्थानमा रहदै एसिया कपका लागि छनोट भएको हो ।

एसिया कपमा स्थान बनाउन जित्नै पर्ने खेलमा हङकङले यूएईलाई ८ विकेटले पराजित गर्यो ।  जितसँगै हङकङले ३ खेलमा ६ अंक जोड्यो ।

युएईले दिएको १ सय ४८ रनको लक्ष्य हङकङले १९ ओभरमा २ विकेट गुमाएर पूरा गर्यो ।

हङकङका यासिम मुर्ताजाले ५८ रनको अर्धशतकीय इनिङ खेले । कप्तान निजाकत खानले ३९ रन जोड्दा बाबर हायतले अविजित ३८ रन बनाए ।

युएईका जुनेद सिद्दिकी र बासिल हामिदले १/१ विकेट लिए ।

त्यसअघि पहिले ब्याटिङ गरेको युएईले १९ ओभर ३ बलमा अलआउट हुँदै १ सय ४७ रन बनाएको थियो ।

युएईका लागि कप्तान रिजवानले ४९ रन जोड्दा जवार फारिदले ४१ रन बनाए ।

हङकङका इशान खानले ४ तथा आयुस शुक्लाले ३ विकेट लिए ।

एसिया कप अगस्ट २७ बाट सूरु हुदैछ । हङकङ समूह 'ए' मा रहेको छ । समूह 'ए' मा साविक विजेता भारत सहित पाकिस्तान र हङकङ रहेका छन् ।

हङकङको पहिलो खेल अगस्ट ३१ मा भारतविरुद्ध रहेको छ ।

प्रतियोगितामा ६ टोली सहभागी हुदैछन् । एसीसीले सहभागी ६ टोलीलाई दुई समूहमा विभाजन गर्दै खेल तालिका सार्वजनिक गरेको हो ।

समूह 'बी' श्रीलंका, बंगलादेश र अफगानिस्तान रहेको छ ।

टी-ट्वान्टी फर्म्याटको प्रतियोगितामा समूहको शीर्ष दुई टोलीले सुपर चारमा स्थान बनाउने छन् । सुपर चारमा एकअर्काविरुद्ध खेल्ने छन् । त्यसपछि शीर्ष दुई टोलीले फाइनल खेल्नेछ ।