'केन्या भ्रमणलाई सकारात्मक लिनुपर्छ'

काठमाडौं । नेपाल क्रिकेट संघ(क्यान) का अध्यक्ष चतुर बहादुर चन्दले नेपालको केन्या भ्रमणलाई सकारात्मक रुपमा लिनु पर्ने बताएका छन् ।

नेपाली राष्ट्रिय क्रिकेट टोली केन्या भ्रमणमा जानु अघि क्यानले आयोजना गरेको बिदाइमा बोल्दै अध्यक्ष चन्दले भ्रमणलाई सकारात्मक रुपमा लिनु पर्ने बताएका हुन् ।

चन्दले वरीयता क्रममा अघि रहेका राष्ट्रले तल रहेका राष्ट्रविरुद्ध खेलेर सहयोग गर्ने आईसीसीको योजना अनुसार नै आफुहरुको केन्या भ्रमण तय भएको बताए ।

'गत महिना भएको आईसीसीको साधारण सभामा यो कुरा आएको थियो,' चन्दले भने, 'केन्याले पनि पटक पटक अनुरोध गरेकोले हामी केन्या जादैछौ ।'

नेपाल ५ खेलको टी-ट्वान्टी सिरिज तथा ३ एकदिवसीय खेलका लागि सोमबार नै केन्या प्रस्थान गरेको छ ।

नेपालमा वर्षाको मौसम रहेकाले खेलाडीहरुलाई खेलमा व्यस्त राख्न यो भ्रमण गरिएको समेत उनले बताए ।

'नेपाल लगायत दक्षिण एसियामा नै मनसुनको समय रहेको छ । हाम्रो मुख्य प्रतियोगिता आगामी नोभेम्बरमा रहेको छ । त्यसका लागि टिम कुन अवस्थामा रहेछ भनेर परिक्षणका लागि यो टुर गरिदैछ,' चन्दले भने, 'यस टुरमा हामीले राम्रो प्रदर्शन गरेर वरीयता केही बढाउने योजनामा रहेका छौ ।'

२०२४ को टी-ट्वान्टी विश्वकपमा वरीयताका आधारमा सिधै छनोटको सम्भावना बाकी नै रहेका कारण यस भ्रमणले वरीयता क्रममा केही अगाडी आउनमा मद्दत मिल्ने समेत अध्यक्ष चन्दले बताए ।

'एकदिवसीय विश्वकपको सेमिफाईनलमा भारतलाई राम्रै चुनौती दिएको राष्ट्र रहेकोले केन्यालाई पनि धेरै कमजोर सोच्न हुन्न,' उनले थपे, 'हाम्रो टोलीले केन्या टुरमा शतप्रतिशत जितको नतिजा ल्याउनेमा क्यान ढुक्क रहेको छ ।'

नेपालले घरेलु टोली केन्यासँग ५ खेलको टी-ट्वान्टी अन्तराष्ट्रिय र ३ खेलको एकदिवसीय सिरिज खेल्नेछ ।

५ खेलको टी-ट्वान्टी सिरिज भदौ ९ बाट १४ गते सम्म हुनेछ । ३ खेलको एकदिवसीय सिरिज भने भदौ १७ बाट २० सम्म चल्नेछ ।

दुबै सिरिज नैरोवीस्थित जीमखाना मैदानमा हुनेछ । नेपाल र केन्याबीच सुरुआतमा ५ खेलको टी-ट्वान्टी सिरिज हुनेछ । त्यसपछि एकदिवसीय सिरिज हुनेछ  ।