‘मेरो कार्यकालमा अनावश्यक संघको अस्तित्व रहदैन’

काठमाडौं । राष्ट्रिय खेलकुद परिषद् (राखेप)का सदस्य सचिव टंकलाल घिसिङले अनावश्यक संघको अस्तित्व खेलकुदमा नरहने बताएका छन् । 

राष्ट्रिय तेक्वान्दो संघ नेपालको रेफ्री रिफ्रेसर कोर्सको आईतबार समापन कार्यक्रममा सदस्य सचिव घिसिङले आफ्नो कार्यकालमा अनावश्यक संघहरुको अस्तित्व नरहने बताएका हुन् । 

उनले विभिन्न कारणले बनेका एकै प्रकृतिका दुई संघलाई एक हुन सुझाव समेत दिएका छन् । 

‘एकै प्रकृतिका खेल रहेर पनि विगतमा किन दुई संघ हुनु परेको हो ?’ सदस्य सचिवले प्रश्न गर्दै भने, ‘त्यसको जवाफ संघमा रहेका नेतृत्वले दिनुपर्छ ।’ 

सरकारले राष्ट्रिय संघ भित्रको विवाद समाधानका लागि पुन प्रक्रिया अघि बढाएको छ । राखेपको पछिल्लो बोर्ड बैठकले संघहरुमा देखिएको विवाद समाधानका लागि राखेप उपाध्यक्ष शिव कोईरालाको नेतृत्वमा समिति समेत गठन गरेको छ । 

कार्यक्रममा राखेप बोर्ड सदस्य अन्जन धमलाले नेपालमा अस्तित्वमा रहेका तेक्वान्दो संघलाई एकिकरण गर्नुपर्ने धारणा राखे । 

‘विश्वमानै तेक्वान्दो संघ एकिकरणको अभियानमा रहेको छ । नेपालमा पनि अस्तित्वमा रहेको तेक्वान्दो संघलाई एकिकृत गर्नुपर्छ ।’ धमलाले भने । 

उनले संघको एकिकरणका लागि परिषद् अघि बढिसकेको उल्लेख गर्दै सदस्य सचिवको कार्यकालमा यसले पूर्णता पाउने विश्वास व्यक्त गरे । 

नेपाली खेलकुदमा एकै प्रकृतिका विभिन्न संघ राखेपमा दर्ता छन् । राष्ट्रिय खेलकुद विकास ऐनले ऐन जारी भएको तीन महिनाभित्र संघको विवाद समाधान गरेर एकै प्रकृतिको एउटा संघ मात्र राखेपमा दर्ता गर्नुपर्ने बताएको छ । तर ऐनको कमजोर कार्यान्वयनका कारण संघको विवाद समाधान हुन सकेको छैन ।