सेड्रिक नायक बन्दा संकटाको लगातार दोस्रो जित

काठमाडौं । सिएमजी संकटा क्लबले पल्सर सहिद स्मारक 'ए' डिभिजन लिग फुटबलमा लगातार दोस्रो जित निकालेको छ । सोमबार भएको खेलमा जावलाखेल युथ क्लबलाई २ - ० ले पराजित गर्दै संकटाले लगातार दोस्रो जित हात पारेको हो ।

ललितपुरको सातदोबाटोस्थित एन्फा कम्प्लेक्समा १० खेलाडीमा सिमित संकटालाई जित दिलाउन सेड्रिक अबाले दुई गोल गरे । पहिलो हाफको २० मिनेट भित्रै १० खेलाडीमा समेटिए पनि संकटाले दोस्रो हाफमा उत्कृष्ट खेल खेल्दै जित हात पारेको हो ।

खेलको १९ औं मिनेटमा एलोन म्यास्कवेलले दोहोरो पहेलो कार्ड खादै रातो कार्ड पाएपछि संकटा १० खेलाडीमा समेटिएको थियो । जारी लिगको यो पहिलो रातो कार्ड हो । तर, दोस्रो हाफमा संकटा खेलमा फर्कियो ।

खेलको ५७ औं मिनेटमा सेड्रिकले गोल गर्दै संकटालाई सुरुवाती अग्रता दिलाए । त्यसपछि खेलको ८५ औं मिनेटमा सेड्रिकले व्यक्तिगत दोस्रो गोल गर्दै संकटालाई २ - ० को महत्वपूर्ण जित दिलाए ।

खेलमा सेड्रिक म्यान अफ दि म्याच चुनिए ।

जितसंगै संकटाले २ खेलबाट ६ अंक जोडेको छ । संकटा लिगको तेस्रो स्थानमा समेत उक्लिएको छ । पहिलो खेलमा संकटाले सरस्वती युथ क्लबलाई १–० ले हराएको थियो ।

जावलाखेलले भने लगातार दोस्रो हार व्यहोरेको छ । पहिलो खेलमा जावलाखेल नेपाल पुलिस क्लबसंग १–० लेपराजित भएको थियो । जावलाखेलले २ खेलमा अंक जोड्न सकेको छैन ।