रोनाल्डोको निर्णायक गोल, पोर्चुगलद्वारा मोरक्को पराजित

एजेन्सी । कप्तान क्रिस्टियानो रोनाल्डो नायक बन्दा पोर्चुगलले फिफा विश्वकप फुटबलमा  मोरक्कोलाई १ - ० गोल अन्तरले पराजित गरेको छ ।

लुजिनिकी रंगशालामा आज भएको खेलमा रोनाल्डोको निर्णायक गोल गर्दा पोर्चुगलले महत्वपूर्ण ३ अंक जोडेको  हो । पहिलो हाफको चौथो मिनेटमा  रोनाल्डोले गोल गर्दै पोर्चुगललाई सुरुआती अग्रता दिलाएका थिए  । रोनाल्डोले उत्कृष्ट हेड गोल गरे । उक्त गोल नै पोर्चुगलको जितमा निर्णायक बन्यो ।

रुसमा जारी विश्वकपमा रोनाल्डोको यो चौथो गोल हो । उनले पहिलो खेल स्पेनविरुद्ध ह्याट्रिक गरेका थिए ।

मोरक्कोविरुद्ध जित निकालेसँगै पोर्चुगलले दोस्रो चरण प्रवेशको सम्भावना बलियो बनाएको छ । जितपछि दुई खेलबाट पोर्चुगलले ४ अंक जोडेको छ ।   पहिलो खेलमा पोर्चुगल स्पेनसँग ३ - ३ गोलको बराबरीमा रोकिएको थियो  । पोर्चुगलले अब इरानसँग खेल्ने छ ।

यता, मोरक्कोको यो लगातार दोस्रो हार हो । पोर्चुगलविरुद्ध बल पोजिसनमा पकड जमाएपनि गोल गर्न नसक्दा मोरक्को पराजित हुन् पुगेको हो । उसको आधा दर्जन पोष्ट आक्रमणले पोष्टको जाली चुम्न सकेन । 

यो हारसँगै मोरक्कोको दोस्रो चरण पुग्ने सम्भावना गणितीय मात्र बाँकी भएको छ । यसअघि पहिलो खेलमा मोरक्को इरानसँग १ - ० ले पराजित भएको थियो ।मोरक्कोले अब स्पेनसँग खेल्ने छ ।