नेपाल स्कटल्याण्डसँग ८ विकेटले पराजित

काठमाडौं । आईसीसी पुरुष विश्वकप लिग टू अन्तर्गत स्कटल्याण्डको त्रिकोणात्मक एकदिवसीय सिरिजको अन्तिम खेलमा नेपालले पराजित भएको छ ।

स्कटल्याण्डको ताइतवड क्रिकेट मैदानमा आइतबार भएको खेलमा नेपाल घरेलु टोलीसँग ८ विकेटले पराजित भएको हो ।

नेपालले दिएको १ सय २९ रनको लक्ष्य स्कटल्याण्डले १९ ओभरमा २ विकेट गुमाएर पूरा गर्यो ।

स्कटल्याण्डको जितमा कलुम म्याकलेओडले ६४ रनको अर्धशतकीय इनिङ खेले ।

यस्तै केली कोएट्जरले अविजित ४४ रन जोड्दा क्रिस्टोफरले १० र कप्तान रिची बेरिङटनले अविजित ४ रन जोडे ।

नेपालका सोमपाल कामी र कप्तान सन्दीप लामिछानेले १/१ विकेट लिए ।

त्यसअघि टस हारेर पहिले ब्याटिङ गरेको नेपालले ३५ ओभर ५ बलमा अलआउट हुँदै १ सय २८ रन बनाएको थियो ।

नेपालका लागि आसिफ शेखले सर्वाधिक ४० रन बनाए । विनोद भण्डारीले १३ रन जोड्दा देव खनाल र रोहित पौडेलले समान १०/१० रन बनाए ।

ओपनर कुशल भुर्तेल ३ रनमा आउट हुँदा दीपेन्द्र सिंह ऐरी, सोमपाल कामी र करण केसीले समान ७ रन बनाए  । आरिफ शेख सुन्य रन आउट भए ।

सन्दीप लामिछाने २२ रनमा आउट हुँदा किशोर महतो सुन्य रनमा अविजित रहे ।

स्कटल्याण्डका हाम्जा ताहिरले ४ तथा मार्क वाटले ३ विकेट लिए । गाभिन मेनले २ विकेट लिए ।

यस हारसँगै नेपालले सिरिजको ४ खेलमा मात्र एक खेलमा जित निकाल्न सफल भएको छ ।

नेपालले यस अघिको भेटमा स्कटल्याण्डलाई ५ विकेटले हराएको थियो । तर, नेपाल नामिबियासँग दुबै खेलमा पराजित भएको थियो ।

स्कटल्याण्ड नेपालविरुद्ध पहिलो भेटमा व्यहोरेको हारको बदला समेत लिएको छ  ।  

नेपाल लिग टू को अंक तालिकाको छैटौं स्थानमा रहेको  छ ।  नेपालले २० खेलमा १७ अंक जोडेको छ ।

स्कटल्याण्ड दोस्रो स्थानमा रहेको छ । स्कटल्याण्डले २४ खेलमा ३४ अंक जोडेको छ ।