एनआरटीको फराकिलो हार

काठमाडौं । नेपालको सहिद स्मारक 'ए' डिभिजन क्लब न्युरोड टिम (एनआरटी) ले टुवान याङ टेरुतमा (टीवाईटी) कप फुटबल प्रतियोगिताको पहिलो खेलमा फराकिलो हार व्यहोरेको छ ।   

मलेसियाको पेनाङमा बिहीबार भएको खेलमा एनआरटी इन्डोनेसियाको लिग टु क्लब कारो एफसीसँग ५-१ गोल अन्तरले पराजित भएको हो ।

पेनाङ सिटी रंगशालामा एनआरटी पहिलो हाफमै ४-० ले पछि परेको थियो । दोस्रो हाफमा थप एक गोल व्यहोर्दा एनआरटीले एक गोल फर्कायो ।

कारो एफसी गिलाङ प्रमुद्या र कार्दिनाता तारिगानले दुई दुई गोल गरे । स्यारिफुदीनले एक गोल थपे ।

एनआरटीका मेसुके ओलोमोउले एक गोल फर्काए ।

अब एनआरटीले शनिबार मलेसियाको सुपर लिग क्लब पेनाङ एफसीसँग खेल्नेछ ।

प्रतियोगिता पेनाङका शहर प्रमुख मिस्टर याङले पद बहाली ग्रहण गरेको पहिलो बार्षिकोत्सवको अवसरमा आयोजना गरिएको हो । 

प्रतियोगिताको विजेताले १० हजार मलेसियन रिङगेट पुरस्कार जित्नेछ । उपविजेता टोलीले ५ हजार मलेसियन रिङगेट पुरस्कार जित्नेछ ।

एनआरटीले ए डिभिजन लिगको तयारी स्वरुप ‘प्रि- सिजन’ का लागि प्रतियोगिता खेलेको हो  ।

मलेसिया भ्रमणपछि एनआरटीले थाईल्याण्डमा ३ मैत्रीपूर्ण खेल खेल्ने छ ।