रेफ्री क्षेत्री र यादवले साफ यू-२० च्याम्पियनसिप खेलाउने

काठमाडौं ।  नेपालका फिफा रेफ्री प्रज्वल क्षेत्री र सहायक फिफा रेफ्री किशन कनैया यादवले साफ यू-२०पुरुष च्याम्पियनसिपमा रेफ्रीको भूमिका निर्वाह गर्ने भएका छन् ।

दक्षिण एसिया फुटबल फेडेरेसनले रेफ्री क्षेत्री र यादवलाई च्याम्पियनसिपका लागि रेफ्रीको रुपमा छनोट गरेको  अखिल नेपाल फुटबल संघ (एन्फा) ले जनाएको छ ।

क्षेत्री र यादवले गत वर्ष फिफा रेफ्री ब्याच प्राप्त गरेका थिए । 

भारतमा आयोजना हुने साफ यू-२० पुरुष च्याम्पियनसिपमा आयोजक भारत, नेपाल, माल्दिभ्स, श्रीलंका र बंगलादेशको सहभागिता रहेको छ ।

च्याम्पियनसिपको उद्घाटन खेलमा नेपालले माल्दिभ्सको सामना गर्नेछ। भुवनेश्वरस्थित कालिङ्गा स्टेडियममा हुने उद्घाटन खेल जुलाई २५ मा हुनेछ ।

नेपालले दोस्रो खेलमा श्रीलंकासँग जुलाई २७ मा खेल्नेछ ।

त्यस्तै भारतसँग जुलाई ३१ र अन्तिम खेल बंगलादेशसँग अगस्ट २ मा खेल्नेछ ।

शीर्ष दुई टोलीले उपाधिका लागि अगस्ट ५ मा प्रतिस्पर्धा गर्ने छन् ।