बेलले गरे लस एन्जलससँग एक वर्षको सम्झौता

काठमाडौं । वेल्सका कप्तान तथा फरवार्ड ग्यारेथ बेल अमेरिकाको एमएलएस क्लब लस एन्जलस एफसीमा अनुबन्धित भएका छन् ।

एमएलएस क्लबले सोमबार औपचारिक रुपमा बेललाई अनुबन्ध गरिएको जनाएको छ ।

लस एन्जलसले बेललाई फ्री ट्रान्सफरमा अनुबन्ध गरेको हो । 

बेलले क्लबसँग एक वर्षको सम्झौता गरेको लस एन्जलसले जनाएको छ ।

स्पेनिस क्लब रियल मड्रिड छाडेर बेल अमेरिका गएका हुन् ।

३२ वर्षीय बेलले ९ वर्ष रियलमा बिताएर सिजनको अन्त्यसँगै क्लब छाडेका हुन् ।

उनी सन् २०१३ मा ८० मिलियन पाउण्डमा टोटेनहमबाट रियल आएको थिए ।

उनले रियलका लागि २ सय ५८ खेलमा १ सय ६ गोल गर्नुका साथै ६७ गोलको अवसर सिर्जना गरेका छन् ।

यस अघि लस एन्जलसले इटालीका पूर्व डिफेन्डर तथा पूर्व कप्तान जर्जियो केलिनीलाई अनुबन्ध गरिसकेको छ ।