रन्जित धिमाल एनआरटीको कप्तान 

काठमाडौं । सहिद स्मारक ए डिभिजन लिग क्लब न्युरोड टिम (एनआरटी) ले डिफेन्डर रन्जित धिमाललाई कप्तान नियुक्त गरेको छ ।

प्रि-सिजन टुर अन्तर्गत मलेसिया र थाइल्याण्ड भ्रमणका लागि एनआरटीले रन्जितलाई कप्तान नियुक्त गरेको हो ।

धिमालको कप्तानीमा एनआरटीले आज शनिबार संकटा क्लबविरुद्ध मैत्रीपूर्ण खेल खेल्दैछ । दशरथ रंगशालामा हुने खेल दिउँसो १:३० बजे सुरु हुनेछ ।

एनआरटीले प्रि-सिजन टुरकै लागि रन्जितलाई अनुबन्ध गरेको हो ।  उनले मछिन्द्र फुटबल क्लबबाट ए डिभिजन लिग खेलेका थिए ।

यस्तै एनआरटीले मिडफिल्डर विशाल राईलाई समेत अनुबन्ध गरेको छ ।

एनआरटीले रन्जित र विशालसँगै डिफेन्डर छिरिङ गुरुङ, मिडफिल्डर गौरव श्रेष्ठ र अट्याकीङ रुमेश बर्तौला, मिडफिल्डर सुवास गुरुङ, फरवार्ड सन्जोक राई, विंगर निकालोस  फर्नान्डेज र  क्यामरुनका गोलकिपर टोलो ल्यान्ड्रीलाई अनुबन्ध गरेको छ ।

एनआरटीले मलेसियामा हुने टुवान याङ टेरुतमा (टीवाईटी) कप फुटबल प्रतियोगिताको खेल्नेछ ।

टीवाईटी कपमा एनआरटीले मलेसियाको सुपर लिग क्लब पेनाङ एफसी र इन्डोनेसियाको लिग टु क्लब कारो एफसीसँग प्रतिस्पर्धा गर्नेछ ।

प्रतियोगिता अन्तर्गत एनआरटीले ३० जुनमा कारो एफसी र २ जुलाईमा पेनाङ एफसीसँग प्रतिस्पर्धा गर्ने छ । लिगको अंकको आधारमा विजेता र उपविजेता टोलिको टुङ्गो लाग्ने छ।

 पेनाङ सिटी रंगशालामा हुने प्रतियोगिताको विजेताले १० हजार मलेसियन रिङगेट पुरस्कार जित्नेछ । उपविजेता टोलीले ५ हजार मलेसियन रिङगेट पुरस्कार जित्नेछ ।

यस्तै एनआरटीले थाईल्याण्डमा ३ मैत्रीपूर्ण खेल खेल्ने समेत जनाएको छ । जसमध्ये एक खेल थाई लिग वान क्लब छोनबुरी एफसीसँग खेल्ने छ।

सहीद स्मारक ‘ए’ डिभिजन लिगको तयारी स्वरुप एनआरटीले ‘प्री सिजन’ खेलका लागि मलेसिया भ्रमण गर्न लागेको हो ।