काठमाडौं । एन्फा राजनीतिमा कुमार केसी अब नौलो नाम रहेन । जिल्ला फुटबलको प्रतिनिधित्व गर्ने कुमार एन्फामा रुपन्देहीबाट उदाएका हुन् । पछि पश्चिम नेपालकै नेता बने । समयले उनलाई मोफसलको फुटबलको नेताको रुपमा उभ्याएको छ ।
कुमार एन्फाको आसन्न निर्वाचनमा उपाध्यक्षका प्रत्यासी छन् । जिल्ला र क्लबको राम्रो प्रभाव राख्ने उनी संस्थापन प्यानलबाट उपाध्यक्षको उम्मेदवार बनेका हुन् । खरो स्वभाव, स्पष्ट बक्ताको परिचय उनको हो ।
चुनावको संघारमा भेटिएका कुमारका एउटा कुरा प्रस्टसँग राखे, ‘विकेन्द्रिकरणनै फुटबलको मुख्य एजेण्डा बन्नुपर्छ । यो कसैलाई तल पार्न पनि हैन । मोफसल बलियो बन्दा मुलधारको फुटबललाईनै सहयोग पुर्याउँछ ।’
भनिन्छ, नेपाली फुटबलको समस्या भनेको यसको संरचना हो । चुनावको मुखमा बहश त्यसैमा हुनु पर्ने हो । तर एन्फा चुनावमा भोट माग्ने र हाल्ने दुवैमा एजेण्डा देखिदैन । सबैको एकसुत्रिय धारणा फुटबल राम्रो गर्ने भन्ने छ । तर फुटबल कसरी राम्रो हुन्छ, त्यसको उत्तर कसैसँग छैन ।
‘खेलाडी उत्पादन त जिल्लामा हुने हो । त्यसैले फुटबललाई विकेन्द्रिकरण गरेरै गाउँगाउँसम्म फुटबल पुर्याउनुपर्छ भन्ने हो । जिल्ला, प्रदेशमा ट्रेनिङ सेन्टर स्थापना गरेर फुटबललाई देशब्यापी बनाउने एजेण्डामा अब काम गर्नुपर्छ ।’ उनी भन्छन् ।
विकेन्द्रिकरणको एजेण्डा फुटबलमा चुनावी मसला मात्र बन्दै आएको छ । तर नेपाली फुटबल यसप्रति कहिल्यै गम्भिर देखिएन । विकेन्द्रिकरणलाई काठमाडौं केन्द्रित क्लब तर्साउन र सिमित वर्गले स्वार्थ पुर्तिको एजेण्डा बनाउँदै आए ।
कुमार विकेन्द्रिकरणको एजेण्डाबाट कोही भाग्न नहुने र कोही तर्सन नहुने बताउँछन् । काठमाडौंमा रहेका क्लबलाई थप बलियो बनाउन समेत मोफसलको फुटबल बलियो बन्नुपर्ने तर्क उनको छ ।
‘काठमाडौंमा मात्र केन्द्रित हुदाँ फुटबलको दायरा बढेन । यसलाई विकेन्द्रित गरेर जिल्लामा लगेर एकेडेमी र ट्रेनिङ सेन्टर चलाउन नसके अहिलेकै अवस्था फुटबल रहिरहन्छ ।’ उनी भन्छन्, ‘अहिले केन्द्र भन्दा स्थानीय सरकार बलियो बनेर आएका छन् । खेलकुदका स्थानीय निकायको लगानी बढेको देखिन्छ । फुटबलमार्फत हामीले यसलाई जोड्नुपर्छ । जिल्लाको फुटबल बलियो बनाउने सुत्र खोज्नुपर्छ ।’
जिल्ला फुटबलबाट आएका कुमारले चार वर्षअघि एन्फाको नेतृत्व परिवतनको अभियानमा शसक्त भुमिका निभाएका थिए । कर्माछिरिङ शेर्पा नेतृत्व प्यानलबाट उनले केन्द्रिय सदस्य पनि जितेका थिए । मोफसलमा तिलोत्तमा गोल्डकप जस्तो प्रतिष्ठित प्रतियोगितो सञ्चालन गरेर जिल्ला फुटबलमा राम्रो छाप छोडेका कुमार अब क्लब फुटबललाई थप व्यवस्थित र व्यवसायीक बनाउने एजेण्डामा काम गर्नुपर्ने एजेण्डा सहित चुनावी मैदानमा छन् ।
‘जिल्ला, क्लबका साथीहरुनै मिलेरै फुटबल बनाउने हो । यसलाई विकेन्द्रिकरण गर्ने र क्लबलाई बलियो बनाउने एजेण्डामा काम गर्नुपर्नेछ । फुटबलको वर्तमान संरचना बदल्ने हाम्रो सामुहिक प्रयास र अठोट हुनुपर्छ ।’ कुमार भन्छन् ।
-1750132667.webp)
