समूह चरणमा दक्षिण अफ्रिकाको शतप्रतिशत जित

काठमाडौं। टी–२० विश्वकपको सुपर ८ मा पुगिसकेको दक्षिण अफ्रिकाले समूह चरणको अन्तिम खेलमा सानदार जित निकालेको छ।

बुधबार सम्पन्न समूह ‘डी’को अन्तिम खेलमा दक्षिण अफ्रिकाले युएईलाई ६ विकेटले पराजित गरेको छ।

१२३ रनको लक्ष्य पछ्याएको दक्षिण अफ्रिकाले १३.२ ओभरमै ४ विकेट गुमाएर लक्ष्य पूरा गर्‍यो। जितसँगै दक्षिण अफ्रिकाले ४ खेलबाट ८ अंक पुर्‍यायो। समान खेलबाट २ अंक जोडेको युएई भने यसअघि नै बाहिरिसकेको थियो।

१२३ रनको लक्ष्य पछ्याउने क्रममा एडेन मार्क्रमले ११ बलमा २८ रनको आक्रामक सुरुआत दिलाए।

क्विन्टन डि ककले १४ रन बनाए भने रायन रिकेल्टनले १६ बलमा ३० रन जोडे।

डेवाल्ड ब्रेभिसले २५ बलमा ३६ रनको महत्त्वपूर्ण इनिङ्स खेले। ट्रिस्टन स्टब्स ६ र जेसन स्मिथ ३ रनमा नटआउट रहे।

युएईका तर्फबाट हैदर अली, मुहम्मद जवादुल्लाह, मुहम्मद अरफान र मुहम्मद फारुकले समान १–१ विकेट लिए पनि टोलीलाई जित दिलाउन पर्याप्त भएन।

यसअघि पहिले ब्याटिङ गरेको युएईले निर्धारित २० ओभरमा ६ विकेट गुमाएर १२२ रन बनाएको थियो।

टोलीका अलिशान शराफुले ३८ बलमा ४५ रन बनाउँदै सर्वाधिक योगदान दिए। कप्तान मुहम्मद वसीमले १२ बलमा २२ रन जोडे भने आर्यान्श शर्माले १३ रन बनाए। अन्य ब्याटरले उल्लेख्य प्रदर्शन गर्न सकेनन्।

दक्षिण अफ्रिकाका कोर्बिन बोस्च सबैभन्दा सफल रहे। उनले ४ ओभरमा मात्र १२ रन खर्चेर ३ विकेट लिए।

एन्रिच नोर्त्जेले २ विकेट लिए भने जर्ज लिन्डेले १ विकेट हात पारे।