काठमाडौं । मनाङ मर्स्याङ्दी फुटबल क्लबको अध्यक्षमा विजय घले नियुक्त भएका छन् । क्लबको बिहिबार बसेको बैठकले नयाँ अध्यक्षमा घलेलाई नियुक्त गरेको हो ।
क्लबको कार्यसमिति बैठकबारे जानकारी दिदै महासचिव तेन्जिङ गुरुङले अध्यक्ष मुखिया गुरुङ्गले दिएको राजीनामा स्विकृत गर्दै घलेलाई नयाँ नेतृत्वमा चयन गरिएको बताए ।
घले वर्तमान कार्यसमितिमा यसअघि उपाध्यक्ष थिए । तर क्लबका सबै पक्षलाई समेट्न भन्दै उनले उपाध्यक्ष पद छाडेका थिए ।
यस्तै, बैठकले क्लबका नयाँ अध्यक्ष घलेलाई एन्फाको आसन्न निर्वाचनमा उम्मेदवार बनाउने औपचारिक निर्णय गरेको छ ।
एन्फाको केन्द्रिय निर्वाचन असार ७ गते हुदैछ । सोही निर्वाचनमा घले अब मनाङ क्लबबाट आधिकारिक उम्मेदवार भएका छन् । एन्फा कार्यसमिति सदस्य रहेका घलेले अन्तिम पटकका लागि एन्फा कार्यसमितिमा उम्मेदवारी दिने तयारी गरेका छन् ।
बैठकले क्लबबाट मताधिकार सहित वरिष्ठ उपाध्यक्ष शुशिल गुरुङ र महासचिव तेन्जिङ गुरुङलाई एन्फाको आसन्न चुनावी साधारण सभामा पठाउने निर्णय गरेको छ ।
-1751767608.webp)
