टोटनहम माथि माथि, आर्सनल तल तल

काठमाडौं । आर्सनल समर्थकलाई सबैभन्दा चिन्ताको विषय हुने गर्छ, टोटनहमले राम्रो गर्ला भनेर । इंग्लिस प्रिमियर लिगमा यी दुई क्लब छिमेकी हुन्, उत्तरी लन्डनका । जति बेला यी दुई क्लब एक आपसमा भिड्ने गर्छन्, यो नर्थ लन्डन डर्बी हुने गर्छ । टोटनहम समर्थकका लागि पनि सबैभन्दा खुसीको खबर भनेको आर्सनलले राम्रो गर्न नसक्नु हो । यो सिजनको प्रिमियर लिगमा एउटा ठूलै विशेषता चौथो स्थानका लागि यी दुई उत्तरी लन्डन क्लबको प्रतिस्पर्धा हो ।

र, छाटँकाँट के छ भने टोटनहमनै चौथो स्थानमा रहनेछ, आर्सनल पाँचौंमा । फेरि यो समीकरण यी दुई क्लबका लागि मात्र रूचिको विषय रहेन् । यसले इंग्ल्यान्डबाट अर्को सिजनका युरोपेली च्याम्पियन्स लिगमा कसले खेल्छ र कसले खेल्दैन भनेर पनि निर्धारण गरेको छ । गर्नेछ । हिजै राति मात्र आर्सनल न्युकासल युनाइटेडको हातबाट पराजित रह्यो । यसको अर्थ धेरै छ । पहिलो, आर्सनलको च्याम्पियन्स लिग खेल्ने सपना लगातार छैटौं वर्ष पनि टुट्ने सम्भावना बढेको छ ।

दोस्रो, आर्सनलको यो हारले अंक तालिकामा चेल्सी तेस्रो स्थानमा रहने पनि निश्चित भएको छ, त्यो भनेको चेल्सीले पनि च्याम्पियन्स लिगका लागि मज्जाले छनोट भएको छ । टोटनहमको ६८ अंक छ भने आर्सनलको ६६ । टोटनहमले अन्तिम दिनको खेलमा रेलिगेसनमा परिसकेको पुछारको क्लब नरविचको सामना गर्नेछ । निश्चित छ, टोटनहमले यसमा जित निकाल्न सक्नेछ । सकेन भने त्यसमा बराबरी निकाले पनि उसले चौथो स्थान हात पार्ने निश्चित हुनेछ ।

टोटनहमलाई आर्सनलमाथि गोल अन्तरको पनि फाइदा छ । आर्सनलको अन्तिम खेल भने एभरटनविरुद्ध छ, जुन आफैमा कठिन हुने निश्चित छ । एभरटन आफै रेलिगेसनको तनाबाट गुज्रिरहेको छ । त्यसैले पनि उसले आर्सनललाई कडा भन्दा कडा चुनौती पेस गर्ने निश्चित छ । केही साता अगाडि मात्र आर्सनल सहज स्थितिमा थियो, चौथो स्थान प्राप्तीका लागि । सबैले आर्सनलको प्रशंसा गरिरहेका थिए र भनिरहेका थिए, यसका प्रशिक्षक मिखेल आर्टेटाले राम्रो काम गरिरहेको छ ।

एक साता अगाडि मात्र आर्सनल र टोटनहमकै भेट भएको थियो । त्यो खेल जितेको भए, आर्सनल कम्तीमा चौथो स्थानमा रहने निश्चित हुन्थ्यो, त्यसको अर्थ, च्याम्पियन्स लिगकै लागि छनोट थियो । तर, टोटनहमको घरमा भएको खेलमा आर्सनल नमज्जाले पराजित रह्यो, तीन गोलले । आर्सनलको हातैमा चौथो स्थान थियो, यो खेलले उसलाई गाह्रो पारेको थियो । अहिले यही आर्सनल न्युकासलसँग पराजित रह्यो, अब त चौथो स्थान उसको पकडमा पनि रहेन् । 

टोटनहमविरुद्धको खेल गुमाएपछि आर्सनलका प्रशिक्षक आर्टेटाले निकै लामो गनगन पनि गरे, विशेषत: रेफ्रीका केही निर्णय आफ्नो क्लबको विपक्षमा रहेको उनको आरोप थियो । टोटनहमका प्रशिक्षक एन्टोनियो कोन्टे पनि के कम, उनले पनि यसको उत्तर दिइहाले । उनको भनाइ थियो, आर्टेटा अलि बढी कुरा गर्छन्, त्यसो नगरेकै राम्रो । उनको तर्क के पनि छ भने आर्टेटाले व्यवस्थापकीय जिम्मेवारी सम्हालेको धेरे भएको छैन्, त्यसैले उनले कम बोल्ने र काम धेरै गर्नु पर्ने हुन्छ ।

अहिले तत्कालका लागि टोटनहम माथि माथि, आर्सनल तल तल देखिन्छ । टोटनहमका लागि एक अर्को सिजन आर्सनल भन्दा माथिल्लो स्थानमा लिग टुंग्याउनु आफैमा ठूलो उपलब्धी हो । सिजनको सुरुमा टोटनहमको सुरुआत पनि राम्रो थिएन् । खराव सुरुआत पनि दृष्यमा आइपुगे, तिनै कोन्टे । उनको आगमन पछि टोटनहमले राम्रो पनि गरेको छ । तर के कस्तो भनेर निचोडमै पुग्नका लागि लिगको अन्तिम दिनको खेलसम्म भने कुरौं ।

–एजेन्सीको सहयोगमा ।