नवौं राष्ट्रिय खेलकुद सर्ने !

काठमाडौं । नवौं राष्ट्रिय खेलकुद प्रतियोगिता सर्ने भएको छ । 

गण्डकी प्रदेशमा आयोजना गर्ने निर्णय गरिएको प्रतियोगिता तयारी अभावका कारण सर्ने निश्चित भएको हो । 

संघीय सरकारको मन्त्रीपरिषद् बैठकले नवौं राष्ट्रिय खेलकुद जेठ २२ देखि २८ गतेसम्म गण्डकी प्रदेशमा आयोजना गर्ने निर्णय गरेको थियो । 

तयारी अभावको कारण देखाउँदै सरकारले नवौं राष्ट्रिय खेलकुदलाई केही महिनाका लागि सार्ने तयारी गरेको हो । 

राखेप स्रोतका अनुसार नवौं राष्ट्रिय खेलकुद प्रतियोगिता असोजको नयाँ मितिमा आयोजना गर्ने तयारी छ । 

‘सार्वजनीक खरिद नियम अनुसार टेण्डर प्रक्रिया पुरा गर्न समय लाग्ने देखियो । सरकारबाट पनि अपेक्षित सहयोग भएन । सोही कारण नवौं राष्ट्रिय प्रतियोगिता सर्ने निश्चित छ ।’ राखेप सदस्य सचिव टंकलाल घिसिङको भनाई उद्धित गर्दै राखेप स्रोतले भन्यो ।  

सदस्य सचिव घिसिङले आन्तरिक छलफलका क्रममा नवौं राष्ट्रिय खेलकुद सर्ने बताउने गरेका छन् । सरकारले केही दिनमा प्रतियोगिता सार्ने र असोजको नयाँ मिति सार्वजनीक गर्ने राखेप स्रोतले बताएको छ । 

मन्त्रीपरिषद्ले जेठ २२ देखि प्रतियोगिता आयोजना गर्ने बताएपनि आवश्यक तयारी अघि बढ्न सकेको थिएन । निकै छोटो समयको तयारीमा प्रतियोगिता गर्ने निर्णय सरकारले गरेको थियो । 

१३ औं दक्षिण एसियाली खेलकुद प्रतियोगितामा जसरी फास्ट ट्रायकबाट सामान खरिद गरेर भएपनि नवौं राष्ट्रिय खेलकुद आयोजना गर्ने खेलकुद मन्त्रालय र राखेपको तयारी थियो । तर सरकारबाट आवश्यक सहयोग नभएपनि प्रतियोगिता सर्ने निश्चित देखिएको हो । 

प्रत्येक दुई वर्षमा आयोजना हुने राष्ट्रिय प्रतियोगिताको नवौं संस्करण २०७७ मा हुनुपर्ने हो । तर कोभिड १९ को प्रभाव र सरकार परिर्वतनका कारण प्रतियोगिता समयमै हुन सकेन ।