राखेपको बोर्ड बैठक शुक्रबार बस्ने

काठमाडौं । राष्ट्रिय खेलकुद परिषद् (राखेप)को बोर्ड बैठक आगामी बैशाख ९ गते बस्ने भएको छ । 

परिषद् सदस्य सचिव टंकलाल घिसिङको प्रस्तावमा युवा तथा खेलकुद मन्त्री महेश्वर गहतराजले राखेपको बोर्ड बैठक बैशाख ९ गते बोलाएका छन् । 

मन्त्री गहतराजको निर्देशनमा राखेपले आगामी शुक्रबार राखेपको बोर्ड बैठक आह्वान गरेको छ । सोही अनुसार राखेपले बोर्ड सदस्यलाई बैशाख ९ गते बैठकका लागि सुचना जारी गरेको छ ।

‘बोर्ड बैठक बैशाख ९ गते बस्ने गरि राखेपबाट जानकारी आएको छ ।’ बोर्ड सदस्य सुमित्रा चौधरीले खेलपाटीसँग भनिन् । 

करिब दुई वर्षपछि राखेपको बोर्ड बैठक पहिलो पटक बस्न लागेको हो । मन्त्री गहतराजले कार्यभार सम्हाले लगत्तै राखेपको बोर्ड बैठक बसाउने तयारी गरेका थिए । तर सदस्य सचिव र बोर्ड सदस्यको मुद्धा अदालत प्रवेश गरेसँगै बैठक प्रभावित बनेको थियो । 

शुक्रबारको बैठकमा अदालत प्रवेश गरेका बोर्ड सदस्यलाई बोलाईएको छैन । तत्कालिन केपी ओली नेतृत्वको सरकारका खेलकुद मन्त्री जगतबहादुर विश्वकर्माले राखेपको अध्यक्षको हैसियतमा नियुक्त गरेका ९ जना बोर्ड सदस्यलाई मन्त्री गहतराजले पदमुक्त गरेका थिए । र राखेप अध्यक्षको हैसियतमा ८ नयाँ बोर्ड सदस्य नियुक्त गरेका थिए । शुक्रबारको बैठकमा गहतराजले आफुले पदमुक्त गरेका र नियुक्त गरेका बोर्ड सदस्यलाई बैठकमा बोलाएका छैनन् । 

अदालतमा बोर्ड सदस्यको मुद्धाको पेशी बैशाख ७ गते रहेको छ । बैशाख ७ गते कुनै निर्णय आएको खण्डमा अदालतको आदेश अनुसार बोर्ड सदस्यलाई बैठकमा समावेश गराउने मन्त्रालयको तयारी छ । तर अदालतबाट अन्तिम फैसला नभएको अवस्थामा तत्कालिन ओली नेतृत्वको सरकारले मन्त्रीपरिषद्बाट नियुक्त गरेका ९ जना बोर्ड सदस्यलाई बैठक बैठकका लागि पत्राचार गरेका छन् । 

अदालतबाट सदस्य सचिवमा टंकलाल घिसिङको पुर्नबहाली भएसँगै खेलकुद मन्त्री गहतराजले बोर्ड बैठकको तयारी थालेका थिए । गण्डकी प्रदेशमा हुने नवौं राष्ट्रिय खेलकुद जेठमा आयोजना गर्ने निर्णय गराएका मन्त्री गहतराजले दुई वर्षदेखि बस्न नसकेको बोर्ड बैठक आह्वान गरेका छन् ।

राष्ट्रिय खेलकुद विकास ऐन २०७७ को धारा १० को ३ मा सदस्य सचिवले अध्यक्षसँगको परामर्शमा परिषद्को बैठक बस्ने, मिति, समय, स्थान र बैठकमा छलफल हुने विषयको सुचि ७ दिनअघि बोर्ड सदस्यलाई पठाउने उल्लेख छ । 

सोही अनुसार राखेपको बोर्ड बैठक आगामी शुक्रबार सिंहदरबारस्थित युवा तथा खेलकुद मन्त्रालयको सभाहलमा बिहान ११ बजे राखिएको छ । बैठकको एजेण्डा तय गर्न सोमबार राखेपको कार्यकारी समितिको बैठक बस्दैछ ।

राखेपको कार्यकारी समितिमा सदस्य सचिव घिसिङ सहित एकेन्द्र कुँवर, नन्दा बस्याल र पदेन सदस्यको रुपमा राखेपका प्रशासनिक विभाग प्रमुख रहनेछन् ।  

खेलकुद ऐनमा राखेपको बोर्ड बैठक वर्षमा कम्तिमा दुई पटक बस्नुपर्ने उल्लेख छ । तर यसअघि खेलकुद चलाउने नेतृत्व नालायक हुँदा पछिल्लो दुई वर्षमा राखेपको बोर्ड बैठक बस्न सकेको थिएन ।