नेपालगन्ज रंगशालामा ‘सेन्थेटिक ट्रयाक’ बन्ने
काठमाडौं । आठौं राष्ट्रिय खेलकुद प्रतियोगिता सम्पन्न भएयता अलपत्र अवस्थामा रहेको नेपालगन्ज रंगशालामा सेन्थेटिक ट्रयाक निर्माण हुने भएको छ ।
युवा तथा खेलकुद मन्त्रालयको विशेष पहलमा अर्थ मन्त्रालयले सेन्थेटिक ट्रयाक निर्माणकालागि बजेटको स्रोत सुनिश्चित गरेसँगै रंगशालाको स्तरोन्नती हुने भएको हो ।
चालु आर्थिक वर्षभित्रै सेन्थेटिक ट्रयाक निर्माणको ठेक्का खोल्न मिल्ने गरी अर्थ मन्त्रालयले १३ करोड ८५ लाख बजेटको स्रोत शुनिश्चित गरेको हो ।
युवा तथा खेलकुद मन्त्री महेश्वर गहतराजले मन्त्री पद सम्हालेदेखी नै नेपालगन्ज रंगशालाको अधुरो काम पुरा गर्ने प्रतिवद्धता जनाउँदै आएका थिए ।
रंगशालामा सेन्थेटिक ट्रयाकका साथै फ्लड लाईट जडानकालागि पहल गर्दै आएका मन्त्री गहतराजले चालु आर्थिक वर्षभित्रै निर्माण कार्य सुरु हुने गरी सेन्थेटिक ट्रयाककालागि बजेट शुनिश्चित गराएका हुन् ।
आठौं राष्ट्रिय खेलकुदका क्रममा निर्माण थालिएको रंगशाला समय अभावको कारण देखाउँदै अधुरै छाडिएको थियो ।
रंगशालामा अहिलेपनि रनिङ ट्रयाक निर्माण, फ्लड लाईट जडान लगायतका महत्वपूर्ण काम बाँकी छ । बजेटको स्रोत सुनिश्चित भएसँगै नेपालगन्ज रंगशाला स्तरोन्नतीको प्रक्रिया सुरु हुने भएको हो । नेपालमा दशरथ रंगशाला, पोखरा रंगशाला र दाङको बेलझुण्डि रंगशालामा मात्र सेन्थेटिक ट्रयाक रहेको छ ।
बाँकेबाट प्रतिनिधि सभामा प्रतिनिधित्व गरेका मन्त्री गहतराजले यसअघि महिला क्रिकेटको उर्वरभूमी बाँकेको कोहलपुरमा महिला क्रिकेट एकेडेमी स्थापनाको निर्णय गरेका थिए ।
