कार्यालय भवनका लागि जग्गा माग

काठमाडौं ।  भक्तपुर जिल्ला खेलकुद विकास समितिले चाँगुनारायण नगरपालिकासंग कार्यलय भवन निर्माणका लागि आवश्यक पर्ने जग्गा उपलब्ध गराउन अनुरोध गरेको छ ।

नगर प्रमुख सोमप्रसाद मिश्रलाई समितिका कार्यलय प्रमुख दुर्गाप्रसाद दुलालले नगरपालिकाको कार्यालयमा अनुरोध पत्र बुझाएका छन् ।

समितिका निवर्तवान अध्यक्ष श्रीभक्त कासिछ्वाको पहलमा चाँगुनारायण नगरपालिका ५ बाँसवारीस्थित साझा सुविधा केन्द्रसँगै रहेको करिब ५ रोपनी सार्वजनिक जग्गा भक्तपुर जिल्ला खेलकुद विकास समितिको नाममा दर्ता रहने गरी जग्गा उपलब्ध गराउन माग गरिएको हो ।

पत्र हस्तान्तरण पश्चात नगर प्रमुख मिश्रले भने– ‘हामी सकारात्मक छौं, पत्रलाई आवश्यक प्रक्रियाका लागि अगाडि बढाउने छौं । चाँगुनारायण  नगरपालिका खेलकुदको विकास र विस्तारका लागि हातेमालो गर्न इच्छुक छ । हामीले एक वडा एक खेल मैदानको निति लिएर खेलकुदको विकासका लागि पूर्वाधार निर्माण गर्दै आएका छौं । अन्तर्राष्ट्रिय मापदण्डको रंगशाला र कभर्डहल निर्माण प्रक्रियामा छ ।’

समितिका निवर्तमान अध्यक्ष कासिछ्वाले जग्गा उपलब्ध गराउन अनुरोध गर्दै भने– ‘म अध्यक्ष हुँदाको सपना हो, खेलकुदको आफ्नै भवन होस भन्ने तर कोरोनाका कारण प्रक्रियालाई तीव्रता दिन सकेनौं । खेलकुदलाई राम्ररी बुझ्नु भएको असाध्य माया गर्ने नगरप्रमुख हामीले पाएका छौं । अवश्य हामी सबैको सपना पूरा हुने छ ।’

समितिले माग गरेको जग्गा चाँगुनारायण नगरपालिका छेउ नगरकोट जाने मुख्य सडकमा रहेको छ ।  कार्यलय भवनका लागि अति उपयुक्त स्थानमा रहेको समितिका कार्यालय प्रमुख दुर्गाप्रसाद दुलालले जनाएका छन् ।