काठमाडौं । द हिमालयन क्रिकेट क्लबले कँडेल कन्सल्टेन्सी क्रिकेट कार्निभल २०२२ द हन्ड्रेड क्रिकेट प्रतियोगिताको उपाधि जितेको छ ।
अस्ट्रेलियाको मेलबर्नमा सम्पन्न प्रतियोगिताको फाइनलमा द हिमालयनले एक्स्पर्ट सगरमाथा ब्लुजलाई १ सय ७ रनको विशाल अन्तरले पराजित गर्यो । द हिमालयनले दिएको २ सय ३ रनको विशाल लक्ष्य पछ्याउने क्रममा ब्लुजले ९५ रन मात्र बनाउन सक्यो ।
लक्ष्य पछ्याउने क्रममा सगरमाथा ब्लुजका सुमित चौधरीले ३९ तथा पारस लामिछानेले ३४ रन बनाए पनि जित दिलाउन सकेनन् । द हिमालयनका बलर उदय देवकोटा एक्लैले ३२ रन खर्चेर ४ विकेट हात पारे भने केशव पन्तले १४ रन खर्चेर ३ विकेट लिए ।
टस जितेर पहिले ब्याटिङ गरेको द हिमालयन क्लबले निर्धारित १०० बलमा ५ विकेट क्षेतीमा २ सय २ रन बनायो । उसका रमनित सिंहले सर्वाधिक ९५ रन तथा केशव पन्तले ६० रन बनाए । एक्स्पर्ट सगरमाथाका बलर हम्जा अलिले २ तथा हरभीन्दर सिंहले १ विकेट लिए ।
फाइनल खेलको प्लेयर अफ द म्याच अलराउण्डर योगदान दिएका केशव पन्त घोषित भए ।
उपाधि सहित द हिमालयन क्लबले तिन हजार डलर र ट्रफी हात पार्यो । यस्तै उपविजेता एक्स्पर्ट सगरमाथाले एक हजार डलर र कप हात पार्यो ।
आजै सम्पन्न सेमीफाइनलमा सेमीफाइनलमा द हिमालयनले फारवेस्ट हन्टर्सलाई तथा एक्स्पर्ट सगरमाथाले गुल्मी टाइगर्सलाई पराजित गरेको थियो ।
द हिमालयन क्लबले आयोजना गरेको कार्निभलमा ८ टोलिको सहभागिता रहेको थियो ।
-1747652309.jpeg)
