दीपेश र प्रिन्स सेमिफाइनलमा

काठमाडौं ।  एपीएफका दीपेश धामी, नेपाल प्रहरीका जीवन आचार्य, रिभाइभका प्रिन्स दाहाल र प्ररहीका विष्णु कटुवाल प्रथम राष्ट्रव्यापी भक्तपुर खुला ब्याडमिन्टन प्रतियोगिताको पुरुष सिंगल्समा शुक्रबार सेमिफाइनलमा प्रवेश गरेका छन् ।

दीपेशले नेपाल आर्मीका प्रफुल महर्जनलाई २१–१३ र २१–१२, जीवनले आर्मीका प्रवीण लिङथेपलाई २१–८ र २१–१८, प्रिन्सले आर्मीका नवीन श्रेष्ठलाई २१–१५ र २१–७ तथा विष्णुले आर्मीका रुकेश महर्जनलाई १९–२१, २१–१८ र २१–१५ ले पराजित गरे ।

महिला सिंगल्समा आर्मीकी अमिता गिरीले आर्मीकै प्राथना देउवालाई २१–१४, १३–२१ र २१–११, आर्मीकी रशिला महर्जनले भोजपुरकी सीता राईलाई २१–१६ र १६–५ (रिटायर्ड हर्ट), प्रहरीकी निता लम्सालले एपीएफकी जेशिका गुरुङलाई २१–१२ र २१–१४ तथा आर्मीकी अनुमाया राईले एपीएफकी सुनयना मुखियाँलाई २१–१५, १८–२१ र २१–१७ को सेटमा हराउदै सेमिफाइनलमा स्थान सुरक्षित गरे ।

यु–१५ ब्वाइज सिंगल्समा कपिल्वस्तुका रोहित बराल, एनआरएनएका साहिल चन्द, कपिल्वस्तुका अभय महरा र सिल्क ग्रुपका कविर केसीले सेमिफाइनल यात्रा तय गरे । सो स्पर्धाको गल्र्समा आर्मीकी रोज पाण्डे, केबीएकी एन्जल लिम्बू, बेल्टार बीएकी रोजी राई र १६ फेडरका रिहाना शेरचन सेमिफाइनलमा पुगे ।

पुरुष डबल्समा एपीएफका दीपेश र विजित थापा मगर, आर्मीका प्रफुल र रुकेश तथा फेडरका क्षितिज खनाल र सुजन थापाको जोडी सेमिफाइनलमा प्रवेश गरे । भेट्रान ४५ वर्षमाथि पुरुष डबल्समा जेस्टका श्याम पराजुली र नवीनबाबु श्रेष्ठ, कास्कीका नरबहादुर गुरुङ र शम्भु श्रेष्ठ, चन्द्रागिरीका राम केसी र हरि खत्री तथा गठ्ठाघर स्पोर्ट्सका पूर्णहरि होना र सञ्जय कपालीको जोडीले सेमिफाइनलमा स्थान बनाए ।