भिल्लासँग पराजित युभेन्ट्स बाहिरियो

काठमाडौं । इटालियन क्लब युभेन्ट्स च्याम्पियन्स लिग फुटबलको अन्तिम १६ बाट बाहिरिएको छ ।

बुधबार राति भएको अन्तिम १६ को दोस्रो लेगमा स्पेनिस क्लब भिल्ला रियलसँग ३-० ले पराजित हुँदै युभेन्ट्स समग्रमा ४-१ ले पछि पर्दै बाहिरिएको हो ।

पहिलो लेगमा दुबै टोलीले १-१ गोलको बराबरी खेलेका थिए । तर, दोस्रो लेगमा भिल्लाले सहजै जित निकाल्यो ।

खेलको ७८ औं मिनेटमा जेरार्ड मोरेनोले पेनाल्टीमा गोल गर्दै भिल्लालाई सुरुआती अग्रता दिलाएका थिए ।

८५ औं मिनेटमा पाउ टोरेसले गोल गर्दै भिल्लालाई २-० को अग्रता दिलाए ।

त्यसपछि खेलको इन्जुरी समयमा अर्नाउट डान्जुमाले गोल गर्दै भिल्लालाई ३-० को सहज जित दिलाए ।

युभेन्ट्स लगातार तेस्रो सिजन च्याम्पियन्स लिगको अन्तिम १६ बाट बाहिरिएको हो ।

भिल्ला भने २००८/९ को सिजनपछि पहिलो पटक क्वाटरफाइनलमा पुगेको हो ।