‘खेलाडीलाई मर्का नपार्ने हिसाबले अघि बढ्छौ’ 

काठमाडौं । ए डिभिजन क्लबहरु न्यूरोड टिम (एनआरटी), मनाङ मस्र्याङदी क्लब, थ्रीस्टार क्लब र संकटा क्लबले नेपाल सुपर लिग (एनएसएल) का लागि खेलाडी अनुबन्धनलाई लिएर चलेको विवादबीच खेलाडीलाई मर्का नपर्ने हिसाब अघि बढ्ने जनाएका छन् ।

चारै क्लबले आईतबार काठमाडौंमा पत्रकार सम्मेलन गरी क्लबमा आवद्ध खेलाडीहरुलाई मर्कामा नपार्ने जनाए । 

तर क्लबहरुले सहिद स्मारक ए डिभिजन लिग चलिरहेकै अवस्थामा एनएसएलको मिति घोषणा गर्नु उपयुक्त नभएको जनाए । 

साथै क्लबसँग खेलाडीको सम्झौता बाँकी रहेकै अवस्थामा एनएसएलका लागि खेलाडी अक्सन गर्नु नियम विपरित भएको चारै क्लबको धारणा रहेको थियो । 

‘क्लबसँग खेलाडीको सम्झौता बाँकी नै छ । साथै क्लबहरुलाई जानकारी नै नदिई खेलाडी बोलकबोल गर्नु आपत्तिजनक हो,’ थ्रीस्टारका महासचिव संजीव सिल्पकारले बताए । 

यसका साथै यस विषयमा एन्फाले क्लबहरुसँग औपचारिक छलफल समेत नगरेको उनीहरुको भनाई छ । 

यसबारे एन्फाले आगामी मंगलबार गर्ने योजना बनाएको बैठकमा छलफल हुनुपर्ने क्लबहरुको माग रहेको छ । 

उनीहरुले एन्फाले यस विषयमा ए डिभिजन क्लबहरुसँग छलफल गर्नुपर्ने आवश्यकता रहेको उल्लेख गरे । 

पत्रकार सम्मेलनमा सहभागी क्लबहरुले अवस्था आए आफूहरुले एन्फामा रहेको निर्वाचित प्रतिनिधिलाई फिर्ता बोलाउन सक्ने जनाए । 

साथै एनएसएल आयोजक नेपाल स्पोर्टस एन्ड इभेन्ट म्यानेजमेन्ट प्राली (एनएसईएम) र एन्फाबीच भएको सम्झौता अनुसार एनएसईएमले संचालन गर्ने कार्यक्रमलाई एएफसी र फिफाबाट मान्यता प्राप्त गर्नका लागि एन्फाले पहल गर्ने विषयमा उनीहरुले गम्भिर ध्यानाकर्षण व्यक्त गरे । 

चारैवटा क्लबले एनएसएलमा सहभागी क्लबहरुले प्रक्रिया नपुर्याएर नै एएफसीको प्रतियोगितामा सहभागिता जनाउन पाउने तथा क्लब लाईसेन्सिङको प्रतिक्रियामा जान सक्नेप्रति आशंका व्यक्त गरे ।