खप्तड गोल्डकप : नारी दिवसमा महिलालाई प्रवेश निशुल्क

धनगढी । धनगढी रंगशालामा जारी पाँचौ मुख्यमन्त्री सुदुरपश्चिम खप्तड गोल्डकप अन्तर्गत भोलि (मंगलबार) हुने खेलमा महिलाहरुलाई प्रवेश शुल्क नलाग्ने भएको छ ।

आयोजक  सुदुरपश्चिम ११ स्पोर्टस क्लबले सोमबार विज्ञप्ति निकाल्दै फागुन २४ गते नारी दिवस परेको हुँदा महिलाहरुलाई प्रवेश निशुल्क गरिएको जनाएको छ ।

प्रतियोगिता अन्तर्गत मंगलबार मछिन्द्र फुटबल क्लब र बागमती क्लबबीच प्रतिस्पर्धा हुनेछ ।

'महिला दिवसको अवसरमा सम्पुर्ण नारीहरुलाई सम्मान व्यक्त गर्दै समस्त महिलाका लागि फागुन २४ गते मंगलबार  मुख्यमन्त्री सुदुरपश्चिम खप्तड गोल्डकपको खेल प्रतियोगिता निःशुल्क हेर्ने व्यवस्था मिलाइएको सबैमा जानकारी गराउदछौं,' विज्ञप्तिमा भनिएको छ, 'साथै यस अवसरमा सरकारले समेत सार्वजनिक विदा दिएकाले तनावमुक्त भएर समयमै उपस्थित भई खेल हेरेर मनोरञ्जन लिनु हुन सबै महिला दिदी बहिनीहरुलाई आग्रह गर्दछौं ।'

प्रतियोगितामा दुई फरक टिकट दर राखिएको छ । जसमा विद्यार्थीका लागि १ सय र अन्यका लागि १ सय ५० राखिएको छ ।