काठमाडौं । च्यासल युथ क्लब कतार एयरवेज सहिद स्मारक 'ए' डिभिजन लिग फुटबलबाट रेलिगेसनमा परेको छ ।
त्रिपुरेश्वरस्थित दशरथ रंगशालामा शनिबार फ्रेन्ड्स क्लबसँग २-१ गोल अन्तरले पराजित भएपछि च्यासल एक खेल बाँकी छदै बी डिभिजनमा घटुवा भएको हो ।
च्यासल तीन सिजन शीर्ष डिभिजनको लिग खेलेर रेलिगेसनमा परेको हो । च्यासल २०७३ सालमा ए डिभिजनमा बढुवा भएको थियो ।
फ्रेन्ड्सलाई जित दिलाउन जमौल एन्थोनी फ्रान्कोइसले दुई गोल गरे । च्यासलका मौसा अबगानाले एक गोल फर्काए ।
खेलको ३८ औं मिनेटमा जमौल एन्थोनीले गोल गर्दै फ्रेन्ड्सलाई सुरुआती अग्रता दिलाएका थिए ।
कप्तान नाथनियल जुड गार्सियाको हेडर पासमा उनले उत्कृष्ट चिप गोल गरे ।
खेलको ४३ औं मिनेटमा जमौल एन्थोनीले पेनाल्टीबाट व्यक्तिगत दोस्रो गोल गर्दै फ्रेन्ड्सलाई २-० को अग्रता दिलाए ।
च्यासलका अविशेक लिम्बुले पेनाल्टी क्षेत्रभित्र एन्थोनीलाई लडाएपछि फ्रेन्ड्सले पेनाल्टीको अवसर पाएको थियो ।
त्यसपछि खेलको ५६ औं मिनेटमा मौसाले पेनाल्टीबाट एक गोल फर्काएपनि च्यासल २-१ ले पराजित भयो ।
फ्रेन्ड्सका गोलकिपर राहुल यादवले पेनाल्टी क्षेत्रभित्र राजिब लोप्चनलाई फउल गर्दै लडाएपछि च्यासलले पेनाल्टीको अवसर पाएको थियो ।
त्यसअघि खेलको २० औं मिनेटमा फ्रेन्ड्सका कप्तान नाथनियलको फ्रि-किक पोस्टको केहि माथिबाट बाहिरिएको थियो ।
यस्तै २३ औं मिनेटमा राजिब लोप्चनको प्रहार क्रसबारमा लागेर फर्किदा च्यासल सुरुआती अग्रता बनाउन चुकेको थियो ।
यस जितसँगै फ्रेन्ड्सले १२ खेलमा १० अंक जोडेको छ । फ्रेन्ड्स लिगको १२ औं स्थान रहेको छ ।
च्यासल १२ खेलमा ६ अंक जोडेर पुछारमा रहेको छ ।
-1752559246.jpeg)
