अबमेयाङ बार्सिलोनामा अनुबन्धित

काठमाडौं । स्पेनिस क्लब बार्सिलोनाले गाबोनका फरवार्ड पिएरे एमरिक अबमेयाङलाई अनुबन्ध गरेको छ ।

बार्सिलोनाले फ्री ट्रान्सफरमा आर्सनलबाट अबमेयाङलाई अनुबन्ध गरेको हो ।

बार्सिलोनाले बुधबार ३२ वर्षीय स्ट्राइकर अबमेयाङलाई अनुबन्ध गरिएको जनाएको छ ।

आर्सनलका पूर्व कप्तान समेत रहेका अबमेयाङले बार्सिलोनासँग २०२५ सम्मको सम्झौता गरेका छन् ।

बार्सिलोनाले उनको रिलिज क्लउज १०० मिलियन युरो राखेको छ ।

अबमेयाङले डिसेम्बरमा अनुशासनको कारबाहीमा परेपछि आर्सनलका लागि खेलेका थिएनन् ।

अबमेयाङले आर्सनलका लागि १ सय ६३ खेलमा ९२ गोल गरेका थिए ।

यस सिजन अबमेयाङले १५ खेलमा ७ गोल गरेका थिए ।