उरुग्वेले भेनेजुएलालाई हरायो

काठमाडौं । कतारमा आयोजना हुने फिफा विश्वकप छनोटमा उरुग्वेले जित निकालेको छ ।

दक्षिण अमेरिकी छनोट अन्तर्गत बुधबार बिहान उरुग्वेले भेनेजुएलालाई ४-१ गोल अन्तरले हराएको हो ।

खेलको पहिलो मिनेटमै रोड्रिगो बेन्टानकुरले गोल गर्दै उरुग्वेलाई सुरुआती अग्रता दिलाएका थिए ।

२३ औं मिनेटमा जिओर्जियन डीले गोल गर्दै उरुग्वेको अग्रता २-० को बनाए ।

पहिलो हाफको इन्जुरी समयमा एडिन्सन काभानीले गोल गर्दै उरुग्वेलाई ३-० को अग्रता दिलाए ।

खेलको ५३ औं मिनेटमा लुइस सुआरेजले पेनाल्टीमा गोल गर्दै उरुग्वेलाई ४-० को अग्रता दिलाए ।

त्यसपछि खेलको ६५ औं मिनेटमा भेनेजुएलाका जोसेफ मार्टिनेजले एक गोल फर्काएपनि उरुग्वे ४-१ ले विजयी भयो ।

यस जितसँगै उरुग्वेले १६ खेलमा २२ अंक जोडेको छ ।

उरुग्वेको विश्वकप पुग्ने सम्भावना कायम रहेको छ ।

भेनेजुएला १० अंक जोडेर पुछारमा रहेको छ ।