‘गोल भन्दा टिमको जितमा खुसी छु’
काठमाडौं । राष्ट्रिय फुटबल टिमका सदस्य सुजल श्रेष्ठले मरिससविरुद्ध आफुले गरेको गोल भन्दा टिमको जितमा खुसी लागेको प्रतिक्रिया दिएका छन् ।
मंगलबार दशरथ रंगशालामा दोस्रो मैत्रीपूर्ण खेलमा मरिससलाई पराजित गर्दा विजयी गोल गरेका सुजलले टिमले प्राप्त गरेको जितमा आफु धेरै खुसी रहेको बताए ।
‘गोल गर्दाको क्षण रमाईलोनै हुन्छ । तर व्यक्तिगत गोल भन्दा टिमले जित्दा खुसी छु ।’ सुजलले खेल लगत्तै भनेका छन् ।
सुजल श्रेष्ठको गोलमा नेपालले मरिससविरुद्धको दोस्रो मैत्रीपूर्ण खेलमा १–० को जित निकालेको छ । पहिलो खेलमा समेत नेपाल १–० ले विजयी बनेको थियो ।
चोट मुक्त हुँदै राष्ट्रिय टिममा कमब्याक गरेका सुजलले सन २०१६ पछि पहिलो पटक राष्ट्रिय टिमबाट गोल गरेका हुन् ।
उनले अन्तिम पटक सन् २०१६ को सोलिडारिटी कपको फाईनलमा मकाउविरुद्ध गोल गरेका थिए ।
चोटका कारण सुजल घरेलु फुटबलमा समेत राम्रोसँग खेल्न पाएका थिएनन् । सुजलको कप्तानीको मछिन्द्र क्लबले शीर्ष स्थानमा रहदै आसन्न एएफसी कप छनोटमा नेपालको प्रतिनिधित्व गर्ने पक्का भैसकेको छ ।
‘यही मैदान र यही पोस्टमा राष्ट्रिय टिमबाट करियरको पहिलो गोल गरेका थिए । आजको गोलले त्यही दिन सम्झिए ।’ उनले भने ।
सुजलले टिमको लक्ष्य एसिया कपको तेस्रो चरणको तयारी रहेको उल्लेख गर्दै सोही अनुसार आफुहरु अघि बढिरहेको बताए । उनले अनुभवी र युवाको मिश्रणले नयाँ टिम बनेको दाबी गरे ।
यसअघि मिडफिल्ड र फरवार्डमा देखिदै आएका सुजललाई मुख्य प्रशिक्षक अब्दुल्लाह अलमुताईरीले डिफेन्सको भुमिकामा समेत प्रस्तुत गर्ने गरेका छन् ।
नेपालले खेलको सुरुवातमै अग्रता लिएपनि खेलमा मरिससले घरेलु टोलीलाई दबाबमा राखेको थियो । तर सुरुवातमा लिएको अग्रतालाई नेपालले अन्तिमसम्म जोगाउन भने सफल भयो ।
‘अग्रतालाई जोगाउन अवश्य पनि गाह्रो भयो । टिममा दबाब पनि पर्यो । तर समग्रमा टिमले राम्रो प्रर्दशन गर्यो ।’ सुजलले भने ।
