आहा रारा - उपाधिका लागि मनाङ र एपीएफ भिड्दै

पोखरा । २० औं संस्करणको आहा रारा गोल्डकप फुटबल प्रतियोगिताको फाइनल खेल आज शनिबार हुँदैछ ।

पोखरा रंगशालामा हुने फाइनलमा मनाङ मर्स्याङ्दी क्लब र विभागीय टिम नेपाल एपीएफ क्लब भिड्ने छन् । फाइनल खेल दिउँसो २ बजे सुरु हुनेछ ।

आज मनाङ र एपीएफ उपाधि जित्ने योजनामा रहेका छन् । ६ पटक उपाधि जितिसकेको मनाङ ७ औं पटक उपाधि आफ्नो पोल्टामा पार्ने योजनामा छ । एपीएफ पहिलो पटक उपाधि उचालेर इतिहास रच्ने दाउमा रहेको छ ।

मनाङले क्वाटरफाइनलमा नेपाल पुलिस क्लबलाई २–० ले हराउँदै तथा बिहीबार भएको दोस्रो सेमिफाइनलमा त्रिभुवन आर्मी क्लबलाई टाइब्रेकरमा ४–३ ले हराउँदै १२ औं पल्ट फाइनलमा प्रवेश गरेको हो ।

एपीएफलले उद्घाटन खेलमा आयोजक सहारालाई २–० तथा पहिलो क्वार्टरफाइनलमा वीवाइएससी मिनिसोटा युएसएलाई ३–१ र सेमिफाइनलमा मछिन्द्रलाई ३–१ ले हराउँदै उपाधिका लागि १४ वर्षपछि फाइनलमा मनाङ संगको भेट पक्क गरेको हो ।

दुबै टिमका कप्तानले आफुहरु उपाधिका लागि खेल्ने बताएका छन् । मनाङका कप्तान विमल रानाले आफ्नो कप्तानीमा आहा रारा गोल्डकपको उपाधि जित्न आफू आतुर रहेको बताए ।

एपीएफका कप्तान नवीन लामा पनि १४ वर्षपछि फाइनलमा पुग्नुलाई महत्वपूर्ण उपलब्धि ठान्दै उपाधि जित्ने गरी खेल प्रदर्शन गर्ने आफुहरुको योजना रहेको बताए ।

सहारा क्लब पोखराको आयोजनामा जारी प्रतियोगिताको विजेताले १० लाख १ हजार र उपविजेता टिमले ५ लाख १ हजार प्राप्त गर्ने छन् ।

यस वर्ष पनि स्वर्गीय सूर्यबहादुर केसीको स्मृतिमा उत्कृष्ट ५ विधाको पुरस्कार प्रदान गरिने छ ।

प्रतियोगितालाई पहिलो संस्करणदेखि नै हिमश्री फुड्स प्रा.लि.को उत्पादन आहा रारा तयारी चाउचाउले प्रायोजन गर्दै आइरहेको छ ।

आहा रारा गोल्डकपको हाल सम्मका विजेता टिमहरु -

-क्याराभान गोल्डकप २०५८– नेपाल पुलिस क्लब– मनाङ मर्स्याङ्दी क्लब २–१

-पहिलो आहा रारा गोल्डकप २०५९– नेपाल पुलिस क्लब– फ्रेन्ड्स क्लब १–० ।

-दोस्रो २०६०– मनाङ मर्स्याङ्दी क्लब– नेपाल पुलिस क्लब ३–१ ।

-तेस्रो २०६१– मनाङ मर्स्याङ्दी क्लब– नेपाल पुलिस क्लब ३–२ ।

-चौँथो २०६२– अफ्रिकन युनाइटेड क्लब– नेपाल पुलिस क्लब २–० ।

-पाँचौ २०६३– थ्रीस्टार क्लब– मनाङ मर्स्याङ्दी क्लब १–१ (५–४ टाइब्रेकर )

-छैठौं २०६४– नेपाल पुलिस क्लब– एपीएफ क्लब २–०