पान्दाम लामागाउँ गोल्डकपको फाईनलमा

इलाम । सातौ संस्करणको लामागाउँ गोल्डकपमा नेपालको मिलियन फ्रेन्डर्स क्लब एमएफसी पान्दाम फाइनल प्रवेश गरेको छ । 

शहिद हवलदार सत्पाल राईको स्मृतिमा भइरहेको प्रतियोगिताको दोश्रो सेमीफाइनलमा सिक्किमको रेडपान्डा नाम्चीलाई २–० गोल अन्तरले हराउँदै पान्दाम फाईनल पुगेको हो । 

फाइनल प्रवेश गरेसँगै पान्दामले २ लाख भारतीय रुपैयाँ सुरक्षित गरेको हो । 

पान्दामको जीतमा सचिन योल्मो र नयन प्रधानले समान एक एक गोल गरे । 

खेलको १५ औ मिनेटमा सचिनले अग्रता दिलाएका थिए । नयनले अग्रता दोब्बर बनाएपछि पान्दामको जित सुनिश्चित बन्यो ।

अब उपाधिको लागि पान्दामले शनिबार मानेभञ्ज्याङ फुटबल क्लब मानेभञ्ज्याङ भारतसंग प्रतिस्पर्धा गर्नेछ ।

मानेभञ्ज्याङले झापा ११ लाई ३–० ले हराउँदै फाइनलमा स्थान बनाइसकेको छ । 

सेभेन ए साइड प्रतियोगिताको विजेताले नगद ४ लाख र उपविजेताले २ लाख भारतीय रुपैया प्राप्त गर्नेछ । 

सेमीफाइनलमा पुग्ने टोलीहरुलाई जनही १० हजार प्रदान गरिएको छ । 

दार्जिलिङको लामागाउँमा आयोजना भइरहेको प्रतियोगिता लामागाउँ वेलफेयर सोसाइटीले हरेक बर्ष आयोजना गर्दै आएको छ ।