पीएसजीको फराकिलो जित

काठमाडौं । फ्रेन्च लिग वान फुटबलमा शीर्ष स्थानको पेरिस सेन्ट जर्मेन (पीएसजी) ले फराकिलो जित निकालेको छ  ।

आइतबार राति भएको खेलमा पीएसजीले रिम्सलाई ४-० गोल अन्तरले हराएको हो ।

घरेलु मैदानमा मार्को भेराट्टीले ४४ औं मिनेटमा गोल गर्दै पीएसजीलाई सुरुआती अग्रता दिलाएका थिए ।

खेलको ६२ औं मिनेटमा सर्जियो रामोसले गोल गर्दा पीएसजी २-० ले अघि रह्यो ।

वोउट फेसले ६७ औं मिनेटमा आत्मघाती गोल गरेपछि पीएसजीको अग्रता ३-० को बन्यो ।

त्यसपछि खेलको ७५ औं मिनेटमा डानिलो पेरीराले गोल गर्दै पीएसजीलाई ४-० को जित दिलाए ।

यस जितसँगै पीएसजीले २२ खेलमा ५३ अंक जोडेको छ ।

रिम्स २४ अंक जोडेर १४ औं स्थानमा रहेको छ ।