एपीएफ फाइनलमा, पुलिसविरुद्ध खेल्ने

काठमाडौं । नेपाल एपीएफ क्लब पीएम कप टी–ट्वान्टी राष्ट्रिय क्रिकेट प्रतियोगिताको फाइनलमा प्रवेश गरेको छ । 

दोस्रो सेमिफाइनल अन्तर्गत टियु क्रिकेट मैदानमा अर्का विभागिय क्लब त्रिभुवन आर्मीलाई ४७ रनले पराजित गर्दै एपीएफ फाइनलमा प्रवेश गरेको हो ।

बुधबार हुने फाइनलमा एपीएफले विभागीय टिम नेपाल पुलिस क्लबको सामना गर्नेछ । पुलिसले बागमतीलाई ५० रनले पराजित गर्दै फाइनलमा स्थान बनाएको हो । 

एपीएफले दिएको २ सय ३१ रनको विशाल लक्ष्य पछ्याउने क्रममा आर्मी १ सय ८३ रनमै सिमित भयो । आर्मीले ९ विकेट गुमायो । 

आर्मीका लागि राजेश पुलामीले २१ बलमा सर्वाधिक ३८ रन जोडे । उनले एक चौका र ४ छक्का प्रहार गरेका थिए । 

भिम सार्कीले १९ बलमा ३५ रन जोडे । उनले ५ चौका र एक छक्का हिर्काए ।

सुमित श्रेष्ठले २४ तथा हरी चौहान २२ रनमा आउट भए  । 

एपीएफका लागि शरद भेषावकरले सर्वाधिक तीन विकेट हात पारे । 

अविनाश बोहरा र भुवन कार्कीले दुई–दुई विकेट लिए । 

किशोर महतो र दिपक बोहराले एक–एक विकेट हात पारे ।  

यस अघि टस हारेर पहिले ब्याटिङ गर्ने निम्तो पाएको एपीएफले निर्धारित २० ओभरमा २ विकेट गुमाउदै २ सय ३० रन जोड्यो । 

एपीएफका लागि आसिफ शेखले सर्वाधिक ८४ रनको योगदान गरे । आसिफले ४३ बल खेल्दै १० चौका र ५ छक्का प्रहार गरे ।

यता लोकेश बमले केवल १८ बलमा ६६ रन बनाउदै अविजित रहे । लोकेशले दुई चौका र ९ छक्का हिर्काए ।  

प्रदिप ऐरीले ५३ बलमा ५७ रन जोडे । उनले ७ चौका र एक छक्का प्रहार गरे । 

आर्मीका जितेन्द्र मुखिया र सुमित श्रेष्ठले एक–एक विकेट हात पारे ।