बागमतीलाई हराउदै पुलिस फाइनलमा

काठमाडौं । नेपाल पुलिस क्लब पीएम कप टी–ट्वान्टी राष्ट्रिय क्रिकेट प्रतियोगिताको फाइनलमा प्रवेश गरेको छ । 

टियु क्रिकेट मैदानमा भएको पहिलो सेमिफाइनलमा बागमती प्रदेशलाई ५० रनले पराजित गर्दै पुलिस फाइनलमा प्रवेश गरेको हो । 

जितका लागि १ सय ५६ रनको लक्ष्य पछ्याएको बागमतीले निर्धारित ओभरमा ८ विकेट गुमाउदै १ सय ५ रनमा सिमित भएपछि पुलिसको जित सुनिश्चित भएको हो । 

बागमतीका लागि आदिल खानले सर्वाधिक २७ रनको योगदान गरे । उनले ३३ बल खेल्दा ३ चौका हिर्काए । 

कप्तान ज्ञानेन्द्र मल्लले १६ बलमा २३ रन जोड्दा चार चौका प्रहार गरे । 

दोस्रो विकेटका लागि ज्ञानेन्द्र र आदिलले ४३ रनको साझेदारी गरेका थिए । 

राम नरेश गिरीले २२ रनमा अविजित रहे । 

पुलिसका दिपेन्द्र सिंह ऐरीले सर्वाधिक ५ विकेट लिए । उनले चार ओभर बलिङ गर्दा केवल १० रन खर्चिए । 

दिपेन्द्रले टिमका लागि नवौं तथा व्यक्तिगत पहिलो ओभरको पहिलो बलमा ज्ञानेन्द्र मल्लको महत्वपूर्ण विकेट लिदाँ सोही ओभरको अन्तिम बलमा विपिन आचार्यको विकेट लिए । 

दिपेन्द्रले दोस्रो ओभरको पहिलो बलमा आदिल खानको अर्को महत्वपूर्ण विकेट हात पारे । 

दिपेन्द्रले तेस्रो ओभरमा थप दुई विकेट लिदै बागमतीको इनिङ्स धराशायी बनाए ।   

सागर ढकालले दुई विकेट तथा आरिफ शेखले एक विकेट लिए । 

यस अघि टस जितेर पहिले ब्याटिङ गरेको पुलिसले निर्धारित २० ओभरमा ५ विकेट गुमाएर १ सय ५५ रन जोड्यो । 

पुलिसका लागि ओपनर पवन सर्राफले अर्धशतकिय इनिङ्स खेले । पवनले ५४ बलमा ३ चौका र ३ छक्काको मदतमा ५९ रनको योगदान गरे । 

दिलिप नाथले विष्फोटक ब्याटिङ गर्दै १६ बलमा अविजित ३१ रन जोडे । उनले दुई चौका र दुई छक्का हिर्काए ।  

अनिल साह २५ रनमा आउट भए । 

बागमतीका नन्दन यादव र रिजन ढकालले समान दुई–दुई विकेट हात पारे । 

प्रतिस जिसीले एक विकेट हात पारे ।