बागमती पीएम कपको सेमिफाइनल नजिक

काठमाडौं । बागमती प्रदेशले पीएम कप टी–ट्वान्टी राष्ट्रिय क्रिकेट प्रतियोगिताको सेमिफाइनलको सम्भावना बलियो बनाएको छ ।

समूह ‘बी’ अन्तर्गत आफ्नो तेस्रो खेलमा प्रदेश नं. २ लाई ५ विकेटले पराजित गर्दै बागमतीले अन्तिम चारको सम्भावना बलियो बनाएको हो ।

बागमतीले तीन मध्ये दुई खेल जित्दै चार अंक जोडेको छ ।

यता चारमध्ये तीन खेलमा पराजय भोगेको प्रदेश २ प्रतियोगिताबाट बाहिरिएको छ ।

यसै समूहमा चारवटै खेल जित्दै नेपाल एपीएफ समूह विजेताको रुपमा सेमिफाइनलमा प्रवेश गरिसकेको छ ।

त्यसैगरी, लुम्बिनीले तीन मध्ये एक जित हात पार्दा गण्डकीले खेलेका दुबै खेलमा पराजय भोगेको छ । अब बागमती, लुम्बिनी र गण्डकीको भने सेमिफाइनलको सम्भावना कायम रहेको छ ।

शुक्रबारको खेलमा १ सय ५६ रनको लक्ष्य बागमतीले अन्तिम दुई बल बाँकी रहदा ५ विकेट गुमाएर पुरा गर्यो ।

बागमतीका लागि लक्की कठायतले सर्वाधिक २८ रन जोडे ।

बागमतीको जितका लागि भने प्रतिस जिसीले ७ बलमा बनाएको अविजित २२ रन महत्वपूर्ण रह्यो । उनले तीन छक्का प्रहार गरे ।

सुवास खकुरेल र कप्तान ज्ञानेन्द्र मल्लले समान २०–२० रन जोडे ।

प्रदेश २ का लागि जितेन्द्र यादवले दुई विकेट लिए ।

पार्थिक यादव, हरिशंकर साह र विवेक यादवले एक–एक विकेट हात पारे ।

यस अघि टस जितेर पहिले ब्याटिङ गरेको प्रदेश २ ले निर्धारित २० ओभरमा ६ विकेट गुमाउदै १ सय ५५ रन जोड्यो ।

प्रदेश २ का लागि हरिशंकर साहले अविजित ५६ रनको योगदान गरे ।

हरिशंकरले ५४ बल खेल्दा ५ चौका र एक छक्का प्रहार गरे ।

विवेक यादवले १७ बलमा २८ रन बनाउदा एक चौका र ३ छक्का हिर्काए ।

कप्तान हसिम अन्सारी २६ रनमा अविजित रहे । उनले १७ बलमा ३ छक्का प्रहार गरेका थिए ।

बागमतीका लागि रिजन ढकाल र विपिन आचार्यले समान दुई–दुई विकेट लिए ।