मार्सियल अनुबन्धको लागि सेभियाको प्रस्ताव अस्वीकार

काठमाडौं ।  इंग्लिस क्लब म्यानचेस्टर युनाईटेडले एन्थोनी मार्सियल अनुबन्धको लागि सेभियाले  गरेको प्रस्ताव अस्वीकार गरेको छ ।

स्पेनिस क्लब सेभियाले मार्सियललाई लोनमा अनुबन्ध गर्ने प्रस्ताव युनाईटेडसँग गरेको थियो ।

तर, युनाईटेडले सेभियाको प्रस्ताव स्वीकार नगरेको बीबीसीले जनाएको छ ।

२६ वर्षीय फ्रेन्च स्ट्राइकर युनाईटेड छाड्न खोजिरहेका छन् ।

मार्सियलले अन्तरिम प्रशिक्षक राल्फ रागनिकलाई आफुले युनाईटेड छाड्न चाहेको बताईसकेका छन्।

सेभियाले जनवरी ट्रान्सफरमा मार्सियललाई लोनमा अनुबन्धको योजना बनाएको थियो ।

मार्सियल सन् २०१५ मा मोनाकोबाट युनाईटेड आएका थिए । त्यति बेला युनाईटेडले उनका लागि ३ करोड ६० लाख पाउन्ड तिरेको थियो र यसक्रममा उनी सर्वाधिक महँगा किशोर खेलाडी भएका थिए ।

युनाईटेडका लागि उनले २ सय ६८ खेल खेल्दै ७९ गोल गरेका छन् ।

मार्सियलले यस सिजन दुई प्रिमियर लिग खेलमा १ गोल गरेका छन् ।

उनले यस सिजन सबैखाले प्रतियोगितामा १० खेल खेलेका छन् ।