मछिन्द्रको १२ खेलको अपराजित यात्रा

काठमाडौं । यसलाई मछिन्द्रको उडान भन्दा हुन्छ, १२ खेलको अपराजित यात्रा ।

सहिद स्मारक लिग ए डिभिजन ०७८ को छैटौं चरणमा सबैभन्दा ठूलो विजेता मछिन्द्र रह्यो ।

उसले यसक्रममा उपाधिको होडमा सबैभन्दा ठूलो चुनौती तेर्साउन सक्ने मनाङ मर्स्याङ्दीलाई हराउन सफल रह्यो ।

लिगको अन्त्यमा ‘हेड टु हेड’ निर्णायक हुने हुँदा यो जितको खास अर्थ हुन्छ ।

मछिन्द्रका लागि यो जित किन पनि महत्त्वपूर्ण छ भने यसक्रममा उसले यस खेलसँगै १२ खेलको अपराजित यात्रा छोएको छ ।

अहिलेको लिगका ६ खेल र पछिल्लो संस्कणका ६ खेलमा मछिन्द्र अपराजित छ, अनि यसमा पनि उसले १० जित निकालेको छ ।

डिफेन्डिङ च्याम्पियन मछिन्द्रले यो लयलाई कामय राख्न सक्यो भने उसले उपाधिको रक्षा गर्न सक्नेछ ।

मनाङलाई हराएयता मछिन्द्र फेरि लिगको शीर्ष स्थानमा उक्लेको छ ।

वर्ष ०७६ को उपाधि यात्राका क्रममा मछिन्द्र छैटौं चरणमै आएर नै पहिलो पल्ट अंक तालिकाको शीर्ष स्थानमा उक्लेको थियो ।

उसले त्यस वर्ष पनि छ खेलबाट ठ्याक्कै १४ अंक बटुलेको थियो, खातामा भने १३ अंक मात्र लेखिएको थियो ।

वर्ष ०७५ को लिगमा पुछारबाट दोस्रो स्थानमा रहेपछि सजाय स्वरूप उसको एक अंक काटिएको थियो ।

पछिल्लो लिगमा भन्दा अहिले मछिन्द्रको प्रदर्शन किन पनि राम्रो छ भन्दा उसले पछिल्ला पाँच खेलमा कुनै गोल खाएको छैन् र क्लिन सिट राखेको छ ।

मछिन्द्रले अहिलेसम्म खेलेका छ खेलमा एकै गोल मात्र खाएको छ । यो टिमको लयको प्रमाण नै त हो ।