गोल खाएपछि खेलाडीले खेल्नै बिर्सियो : प्रशिक्षक मिश्र

काठमाडौं । सहिद स्मारक ‘ए’ डिभिजन लिग फुटबलमा सोमबार फ्रेन्ड्स क्लब एपीएफ क्लबसँग पराजित भयो ।

त्रिपुरेश्वरस्थित दशरथ रंगशालामा फ्रेन्ड्सले एपीएफविरुद्ध ३-१ को हार व्यहोरेको हो ।

यस हारसँगै फ्रेन्ड्स पाँचौं चरणसम्म जित विहीन बनेको छ । फ्रेन्ड्स २ अंक जोडेर पुछारमा रहेको छ ।

एपीएफसँग पराजित भएपछि फ्रेन्ड्सका मुख्य प्रशिक्षक मृगेन्द्र मिश्रले गोल खाएपछि आफ्नो खेलाडीले फुटबल खेल्न बिर्सेको प्रतिक्रिया दिए ।

'हामीलाई खेल जित्नैपर्ने थियो । हामी रेलिगेसनमा थियौं र हामीलाई दबाब थियो । हामीले २५ मिनेटमा ३/४ वटा अवसर पाएला थियौं,' उनले भने, 'तर, २५ मिनेटपछि टिमले फुटबल खेल्नै बिर्सेजस्तो भयो । २५ मिनेटपछि हाम्रो गोल भयो त्यो अफसाइड दियो । त्यसपछि टिमले फुटबल खेल्न सकेन । त्यसपछि सामान्य गल्तिहरुले गोल खान पुग्यौं ।'

प्रशिक्षक  मिश्रले आफ्नो लक्ष्य टिमलाई रेलिगेसनबाट जोगाउने रहेको बताए ।

'मैले सुरुबाटै भनेको थिए । टिममा पर्फेक्ट खेलाडीहरु छैन । छोटो समयमा टिम हेरेका छौँ । टिमको ठुलो लक्ष्य छैन । मेरो पहिलो लक्ष्य चै यो वर्ष टिमलाई कसरि जोगाउने छ,' उनले भने ।

प्रशिक्षक मिश्रले कप्तान प्रकाश बुढाथोकी घाइते भएपछि मैदानमा टिमको नेतृत्व गर्न सकेन खेलाडीको अभाव देखिएको समेत बताए ।