खेलकुद मन्त्री गहतराजले गरे खेल पुर्वाधारको निरिक्षण

काठमाडौं । युवा तथा खेलकुद मन्त्री महेश्वरजंग गहतराजले दाङमा रहेका खेल पुर्वाधारको निरिक्षण गरेका छन् ।

दुई दिने जिल्ला भ्रमणका लागि दाङ पुगेका मन्त्री गहतराजले बेलझुण्डी र रामपुरमा रहेका खेल पुर्वाधारको निरिक्षण गरेका हुन् ।

राष्ट्रिय खेलकुद परिषदको प्रतिनिधि सहित बेलझुण्डी रंगशालाको निरिक्षणमा पुगेका मन्त्री गहतराजले निर्माणाधिन अवस्थामा रहेका तथा निर्माण सम्पन्न भईसकेका खेल संरचनाको संरक्षण गर्नुपर्ने बताए ।

राज्यको करोडौं लगानीमा तयार भएका खेल संरचना संरक्षण अभावमा जिर्ण हुने अवस्थामा पुग्नु दुखद भएको बताउँदै मन्त्री गहतराजले सम्बन्धि स्थानियले नै संरक्षणकालागि अपनत्व लिनुपर्नेमा जोड दिए ।

निर्धारित समयमै नवौं राष्ट्रिय खेलकुद प्रतियोगिता संचालन गर्न आवश्यक तयारी सुरू भईसकेको बताउँदै मन्त्री गहतराजले आठौं राष्ट्रिय खेलकुद प्रतियोगिताका पुर्वाधारको मर्मत सम्भार तथा थप नयाँ पुर्वाधार निर्माणकालागि आवश्यक बजेट बिनियोजन गरिने बताए ।

'हामीसँग प्रर्याप्त मात्रमा खेल पुर्वाधार छन् ।' उनले भने, 'उपलब्ध पुर्वाधारमै नवौं राष्ट्रिय खेलकुद प्रतियोगिता संचालन गर्न सम्भव छ । हामी त्यसको तयारीमा जुटेका छौं ।'

अनुगमनका क्रममा मन्त्री गहतराजले आठौं राष्ट्रिय खेलकुद प्रतियोगिताकालागि निर्माण गरिएका खेल संरचनाका साथै दाङ जिल्ला क्रिकेट संघको कार्यालय, घोराही कभर्ड हल, राष्ट्रिय खेलकुद परिषदको कार्यालय तथा कार्यालयसँगै रहेको रंगशालाको सेन्थेटिक ट्रयाकको समेत अनुगमन गरका थिए ।