आल्भेस बार्सिलोना फर्कने
एजेन्सी । बार्सिलोना ब्राजिली डिफेन्डर डानी आल्भेसलाई क्लबमा फर्काउन सहमत बनेको छ ।
३८ वर्षका आल्भेस पाँच वर्ष अघि नाउ क्याम्प छाडेर युभेन्ट्स गएका थिए ।
आल्भेसले बार्सिलोना, पीएसजी र युभेन्ट्सबाट मुख्य ९ ठुला उपाधि जितेका छन् ।
आल्भेसले सन् २००८ देखि २०१६ सम्म बार्सिलोनामा बिताएका थिए । उनले सो दौरान ६ पटक लिग उपाधि जितेका थिए ।
उनले तीन च्याम्पियन्स लिग उपाधि र चार कोपा डेल रे जितेका छन् ।
बार्सिलोनाले आल्भेसको बारेमा उल्लेख गर्दै उनी क्लब इतिहासको सर्वकालिन महान राइट डिफेन्डर भएको उल्लेख गरेको छ ।
'उनी अर्को हप्ता क्लबको प्रशिक्षणमा जोडिनेछन् । तर जनवरीभन्दा यता उनले खेल्न पाउने छैनन् ।' क्लबले भनेको छ ।
बार्सिलोनामा रहदा आल्भेसले २४ उपाधि जितेका थिए । जसमा तीन फिफा क्लब विश्वकप, तीन स्पेनिस सुपर कप र चार युरोपियन सुपर कप रहेका छन् ।
उनले सन् २०१६ देखि १७ मा सिरि एको उपाधि समेत जिते । यस्तै लिग वानमा सन् २०१७ देखि १८ र २०१८ देखि १९ को बीचमा लिग उपाधि जिते ।
उनले सन् २०१९ मा ब्राजिली क्लब साउ पाउलोसँग सम्झौता गर्दै आफ्नो देश फर्किका थिए । गत अगष्टमा देशको कप्तानी गर्दै उनले ब्राजिललाई ओलम्पिकमा स्वर्ण पदकनै जिताए ।
तलब नपाएको विषयमा विवाद आएपछि सेप्टेम्बरमा उनको क्लबसँग सम्झौता समाप्त भैसकेको छ ।
