ज्याभी चाहन्छन्, बार्सिलोना फर्कन

एजेन्सी । 

ज्याभी चाहन्छन्, घर फर्कन ।

घर फर्कनु भनेको त बार्सिलोना फर्कनु नै भयो ।

उनलाई विश्वास छ, बार्सिलोना र अहिलेको उनको क्लब अल सादबीच कुनै न कुनै प्रकारको सहमती हुन्छ ।

ज्याभी अहिले दोहामा छन् र कतारी टिमको जिम्मेवारी सम्हालिरहेका छन्, प्रशिक्षकका रूपमा ।

अल साद उनलाई सिजनको बीचमा छाड्न तयार छैन ।

क्लबले भनिसकको छ, सिजन अहिले निर्णायक मोडमा छ, त्यसैले आफ्ना प्रशिक्षकलाई बार्सिलोना जान दिइने छैन् । तर बार्सिलोनाका पदाधिकारीहरू भने दोहामा छन् र अल सादसँग छलफलमा ब्यस्त छन् ।

बार्सिलोना चाहन्छन्, आफ्ना ४१ वर्षीय पूर्व खेलाडी प्रशिक्षकका रूपमा क्याटलान क्लबमा फर्कोस ।

केही दिन अगाडि रोनाल्ड कोमनलाई वर्खास्त गरेको बार्सिलोनामा ज्याभी नै नयाँ प्रशिक्षकका लागि सबैभन्दा बलियो प्रत्यासी रहको छ ।

ज्याभीले भनेका छन्, ‘केही दिनदेखि छलफल भइरहेको छ । सबैलाई म अहिले कुन स्थितिमा छु भनेर थाहा छ । त्यसैले दुवै क्लब कुनै विन्दूमा आपसी सहमतीमा पुगे राम्रो ।’

स्पेनी लेजेन्ड खेलाडी ज्याभीले बार्सिलोनाका लागि सन् १९९८ देखि २०१५ बीच ७ सय ७९ खेल खेले र यसक्रममा २५ ठूला उपाधि जिते ।

उनी अल सादमा पछिल्लो चार वर्षदेखि छन् ।

सन् २०१९ मा खेलाडी जीवनबाट सन्यास लिएका थिए । उनकै नेतृत्वमा अल सादले गत वर्ष कतारी लिग जितेको थियो र यसपल्ट टिम ३६ खेलमा अपराजित रहेको छ ।

–बीबीसीको सहयोगमा ।