टोटेनहम कोन्टेसँग छलफलमा

एजेन्सी । टोटनहम नयाँ प्रशिक्षकको रुपमा एन्टोनियो कोन्टेसँग छलफलमा जुटेको छ ।

टोटेनहमका अध्यक्ष डेनियल लेवी र प्रबन्ध निर्देशक फेबियो पाराटिसीले प्रशिक्षक नुनो सेन्टोलाई बर्खास्त गर्ने निर्णयसँगै नयाँ प्रशिक्षकलाई अनुबन्धन गर्ने गृहकार्य सुरु गरेका छन् ।

५२ वर्षिय कोन्टेले सोमबार क्लबका पदाधिकारीसँग प्रत्यक्ष भेटघाट गर्नेछन् । मंगलबारनै नयाँ प्रशिक्षकको घोषणा हुने अपेक्षा गरिएको छ ।

इटालियन प्रशिक्षकले गत मेमा इन्टर मिलान छाडेका थिए । क्लबलाई सिरि एको उपाधि जिताएपछि उनले इन्टर छाडे ।

उनले चेल्सीबाट प्रिमियर लिग र एफ ए कप जितेका छन् । उनी सन् २०१८ को जुलाईमा दोस्रो सिजनमै बर्खास्तीमा परेका थिए ।

उनले सन् २०११ देखि १४ सम्म युभेन्ट्स पनि हेरे । जहाँ उनले तीन पटक सिरि एको उपाधि जिते । उनले त्यसपछि इटालीको राष्ट्रिय टिम सन् २०१४ देखि २०१६ सम्म हेरेका थिए ।

टोटेनहम गत समरमा कोन्टेसँग छलफलमा रहेको थियो । क्लबले जोसे मौरिन्होको प्रतिस्थापनको रुपमा कोन्टेसँग छलफल गरेको थियो ।

तर दुवै पक्षबीच कुनै सम्झौता हुन सकेन । त्यसपछि क्लबले नुनोलाई क्लबको जिम्मेवारी दिएको थियो ।

नुनोले क्लब सम्हालेको १७ खेलमै बर्खास्तीमा परेका छन् ।

गत शनिबार म्यानचेस्टर युनाइटेडको हातबाट ३–० गोल अन्तरले पराजित भएपछि नुनो बर्खास्तीमा पर्ने अनुमान गरिएको थियो ।