भनिमण्डलको लगातार दोस्रो जित

काठमाडौं । भनिमण्डल स्पोर्टिङ क्लबले मेयर कप भेट्रान्स फुटबल प्रतियोगितामा लगातार दोस्रो जित निकालेको छ ।

त्रिपुरेश्वरस्थित दशरथ रंगशालामा सोमबार वी आर ब्रोदर्सलाई १-० गोल अन्तरले पराजित गर्दै भनिमण्डलले लगातार दोस्रो जित निकालेको हो ।

भनिमण्डलको जितमा प्रदिप महर्जनले निर्णायक गोल गरे । उनले खेलको ५८ औं मिनेटमा गोल गरेका थिए ।

पहिलो खेलमा भनिमण्डलले न्युरोड टिम (एनआरटी) लाई २-० ले हराएको थियो ।

अर्को खेलमा एसएनकेसीले बौद्ध भेट्रान्सलाई ४-० ले हराएको छ ।

एसएनकेसीको जितमा सुरेन्द्र तामाङले दुई गोल गरे । रमेश सिन्केमान र बिभोर गुरुङले एक एक गोल गरे ।

फुटबलर्स मिसन टुगेदरको आयोजनामा जारी प्रतियोगितामा २१ टिमले प्रतिस्पर्धा गरिरहेका छन् ।

२१ टिमलाई सात समूहमा विभाजन गरिएको छ । प्रत्येक समूहका विजेता र एक उत्कृष्ट उपविजेता टिमले दोस्रो चरणमा स्थान बनाउनेछन् ।

प्रतियोगिताको विजेताले ५ लाख र उपविजेताले २ लाख ५० हजार पाउने पाउने छन्।

त्यस्तै विधागत रुपमा उत्कृष्ट खेलाडीलाई विशेष पुरस्कारको व्यवस्था गरिएको आयोजकले जनाएको छ ।